Самарқандда фуқароларни 3 йилдан буён Исроилга ишга жўнатишни ваъда бериб келаётган аёлга нисбатан жиноят иши қўзғатилди. Бу ҳақда Тергов департаменти хабар бермоқда.
Маълум қилинишича, Самарқанд тумани Гаффаров кўчасида яшовчи 28 ёшли М.Ш. Самарқанд шаҳри бўйича ИИО ФМБга ариза билан мурожаат қилган. Ўз аризасида Самарқанд шаҳри Садриддин Айний маҳалласида яшовчи 42 ёшли И.Д.(аёл) уни Исроилга ишлашга юборишини ваъда қилиб, 2019 йил ноябрь ойидан 2021 йил январь ойига қадар бўлиб-бўлиб, жами 14 100 доллар олгани, бироқ шу кунга қадар И.Д. уни Исроилга юбормасдан, пулларини қайтариб бермай, алдаб келаётгани, шу сабабли унга нисбатан қонуний чора кўришни сўраган.
Бундан ташқари, Самарқанд тумани «Қўшмасжид» МФЙда яшовчи 36 ёшли Д.У. ариза билан мурожаат қилиб, унда И.Д. (аёл) уни ҳам Исроилга ишлашга юборишини ваъда қилиб, 2019 йил декабрь ойидан 2020 йил январь ойига қадар бўлиб-бўлиб, жами 10 минг долларни олгани, бироқ шу кунга қадар уни Исроилга юбормасдан, пулларини қайтариб бермай, алдаб келаётганини айтиб, шу сабабли унга нисбатан қонуний чора кўришни сўраган.
Мазкур ҳолатлар юзасидан Самарқанд шаҳри бўйича ИИО ФМБ ҳузуридаги тергов бўлими томонидан Жиноят кодекснинг 168-моддаси 3-қисми «а», «б» бандлари (фирибгарлик) билан жиноят иши қўзғатилган. Жиноят иши доирасида унинг келиб чиқиш сабаблари ўрганилиб, ҳуқуқий баҳо берилиши таъминланади. Ҳозирда тергов ҳаракатлари олиб борилмоқда.
Изоҳ (0)