Azim Mullaxonov mudhish avariyaga uchragani hamda yaqinlarining ketma-ket o‘limidan esankirab qolgani haqida (video)

O‘zbekistonda xizmat ko‘rsatgan artist Azim Mullaxonov “Daryo”ning YouTube-kanaliga bergan intervyusida ketma-ket ikki marta avtohalokatga uchragani, sog‘lig‘idagi jiddiy muammo va yaqinlaridan ayrilgani haqida so‘zlab berdi.

— Musibat bir kelsa, ketma-ket keladi, deyishadi. 2008-yili avtohalokatga uchraganman. Oradan hech qancha vaqt o‘tmay, takror avariyaga uchradim. Shunda qattiq betob bo‘lib, bir qulog‘im shang‘illab qolgan. Bu ham bir dard ekan, ancha vaqtgacha davolandim. Ammo dardim arimay turib, akamdan ayrilib qoldim. Uni 2012-yili yerga qo‘ydim. Oradan bir yil o‘tmay kelinoyim ham kutilmagan dard sabab olamdan o‘tdi. Hali dardimiz arimay turib, 2014-yili onamdan ayrildik. Bu oilamiz uchun katta musibat edi. Ketma-ket yaqinlarini yo‘qotish oilamiz uchun og‘ir sinov bo‘ldi, — deydi xonanda Azim Mullaxonov.

Suhbat davomida xonanda “Ey go‘zal” qo‘shig‘ini ijro etishni istamagani va u Muhriddin Xoliqov ijrosida xalqqa manzur bo‘lgani haqida so‘zlab berdi.

— Qo‘shiq yaratilgan vaqt videomagnitofonlar endi chiqqan paytlar edi. So‘z ustasi Mirzabek Xolmedov bu qo‘shiqni videomagnitofonda eshitib, yoqtirib qolgan. Qo‘shiqning ohangi va musiqasi ma’qul bo‘lganidan keyin unga moslab she’r yozgan. U bilan do‘st, aka-ukadek qadrdon bo‘lganimiz uchun qo‘shiqni menga olib kelib, ijro etishimni so‘ragan.

Qo‘shiqning bir-ikkita yerini o‘zgartirgani bilan, baribir hind qo‘shig‘idan olinganini payqash qiyin emasdi. O‘sha paytda ham hindlar eshitib qolsa nima bo‘ladi, deb efir uchun aytishni istamaganman. Ijromdagi qo‘shiq biror marta radio va televideniyeda efirga berilmagan.

Oradan ancha vaqt o‘tganidan keyin Mirzabek Xolmedov “Azim akam aytmadilar, siz ijro eting”, deb qo‘shiqni Muhriddin Xoliqovga bergan. Haqiqatan Muhriddinning ijrosidagi qo‘shiq omadli chiqqan. Uning ustiga o‘sha paytlarda radio va televideniyedagi vaziyat ancha yumshagan edi. Muhriddinning qo‘shig‘ini tez-tez berishgani uchun u xalq tiliga tushdi, — deydi xonanda Azim Mullaxonov.

Mavzuga doir:

• “Qonunlarga bo‘ysunishmasdi, ba’zilar uchun san’atkorni urish faxr edi”. Azim Mullaxonov xonandalar uchun qiyin kechgan 90-yillar haqida (video)
• “Bu ishni qilayotganlar haromdan pul topyapti”. Azim Mullaxonov “Nihol” mukofotining saralash bosqichidagi qing‘irliklar haqida (video)
• “Shaytanat’ qo‘shig‘i uch kunda tayyor bo‘lgan”. Azim Mullaxonov mashhur qo‘shig‘ining yaratilish tarixi haqida (video)