Азим Муллахонов мудҳиш аварияга учрагани ҳамда яқинларининг кетма-кет ўлимидан эсанкираб қолгани ҳақида (видео)

Ўзбекистонда хизмат кўрсатган артист Азим Муллахонов «Дарё»нинг YouTube-каналига берган интервьюсида кетма-кет икки марта автоҳалокатга учрагани, соғлиғидаги жиддий муаммо ва яқинларидан айрилгани ҳақида сўзлаб берди.

— Мусибат бир келса, кетма-кет келади, дейишади. 2008 йили автоҳалокатга учраганман. Орадан ҳеч қанча вақт ўтмай, такрор аварияга учрадим. Шунда қаттиқ бетоб бўлиб, бир қулоғим шанғиллаб қолган. Бу ҳам бир дард экан, анча вақтгача даволандим. Аммо дардим аримай туриб, акамдан айрилиб қолдим. Уни 2012 йили ерга қўйдим. Орадан бир йил ўтмай келинойим ҳам кутилмаган дард сабаб оламдан ўтди. Ҳали дардимиз аримай туриб, 2014 йили онамдан айрилдик. Бу оиламиз учун катта мусибат эди. Кетма-кет яқинларини йўқотиш оиламиз учун оғир синов бўлди, — дейди хонанда Азим Муллахонов.

Суҳбат давомида хонанда «Эй гўзал» қўшиғини ижро этишни истамагани ва у Муҳриддин Холиқов ижросида халққа манзур бўлгани ҳақида сўзлаб берди.

— Қўшиқ яратилган вақт видеомагнитофонлар энди чиққан пайтлар эди. Сўз устаси Мирзабек Холмедов бу қўшиқни видеомагнитофонда эшитиб, ёқтириб қолган. Қўшиқнинг оҳанги ва мусиқаси маъқул бўлганидан кейин унга мослаб шеър ёзган. У билан дўст, ака-укадек қадрдон бўлганимиз учун қўшиқни менга олиб келиб, ижро этишимни сўраган.

Қўшиқнинг бир-иккита ерини ўзгартиргани билан, барибир ҳинд қўшиғидан олинганини пайқаш қийин эмасди. Ўша пайтда ҳам ҳиндлар эшитиб қолса нима бўлади, деб эфир учун айтишни истамаганман. Ижромдаги қўшиқ бирор марта радио ва телевидениеда эфирга берилмаган.

Орадан анча вақт ўтганидан кейин Мирзабек Холмедов «Азим акам айтмадилар, сиз ижро этинг», деб қўшиқни Муҳриддин Холиқовга берган. Ҳақиқатан Муҳриддиннинг ижросидаги қўшиқ омадли чиққан. Унинг устига ўша пайтларда радио ва телевидениедаги вазият анча юмшаган эди. Муҳриддиннинг қўшиғини тез-тез беришгани учун у халқ тилига тушди, — дейди хонанда Азим Муллахонов.

Мавзуга доир:

• «Қонунларга бўйсунишмасди, баъзилар учун санъаткорни уриш фахр эди». Азим Муллахонов хонандалар учун қийин кечган 90 йиллар ҳақида (видео)
• «Бу ишни қилаётганлар ҳаромдан пул топяпти». Азим Муллахонов «Ниҳол» мукофотининг саралаш босқичидаги қинғирликлар ҳақида (видео)
• «Шайтанат’ қўшиғи уч кунда тайёр бўлган». Азим Муллахонов машҳур қўшиғининг яратилиш тарихи ҳақида (видео)