Parijdagi Luvr muzeyida O‘zbekistonning ikki ming yillik – islomgacha bo‘lgan davrdan temuriylar davrigacha bo‘lgan davrni o‘z ichiga olgan madaniy merosiga bag‘ishlangan keng ko‘lamli ko‘rgazma ochiladi. U bugungi O‘zbekistonning janubiy hududidan o‘tgan Buyuk Ipak yo‘li tarixi haqida so‘zlab beradi, monumental va dastgoh san’ati buyumlari, devor rasmlari, saroylarning o‘yilgan detallari, badiiy hunarmandchilik buyumlarini taqdim etadi.
Ipak yo‘li tutashgan hududda turli madaniyatlar va turmush tarzini ifodalovchi juda ko‘p sivilizatsiya va etnik guruhlarning izlari va xazinalari mavjud. So‘nggi bir necha yil ichida ko‘plab arxeologik kashfiyotlar, shuningdek, muhim restavratsiya ishlari amalga oshirildi. Demak, ekspozitsiyaning bir qismi ilk bor ommaga namoyish etiladi.
Ko‘rgazmadan 168 ta muzey eksponati, xususan, O‘zbekiston Respublikasining 13 ta muzeyidan 137 ta, shuningdek, dunyoning yetakchi muzeylaridan 31 ta eksponat o‘rin olgan. Ayniqsa, ko‘rgazma uchun o‘zbek va fransuz mutaxassislari tomonidan 70 ta buyum restavratsiya qilindi. Qayta tiklash ishlari 2017-yilda boshlangan. Bundan tashqari, Luvr mutaxassislari bilan birgalikda O‘zbekistondan Fransiyaga eng qimmatbaho buyumlarni tashish tizimi yo‘lga qo‘yildi va puxta tashkil etildi.
Ko‘rgazma O‘zbekiston Respublikasi Vazirlar Mahkamasi huzuridagi Madaniyat va san’atni rivojlantirish jamg‘armasi, Luvr muzeyi bilan hamkorlikda tashkil etildi.
“Daryo” muxbiri muzeydagi ushbu ko‘rgazmadan fotoreportaj tayyorladi.
Izoh (0)