O‘zbekistonda 2022-yilning 21-noyabridan boshlab 20 kun davomida 2022 yil 1-yanvardan (1-yanvar ham kiradi) xato chop etilgan onlayn nazorat kassa texnikasi onlayn-NKT cheklarini tahrirlashga imkoniyat berildi. Bu haqda Davlat soliq qo‘mitasi xabar bermoqda.
Buning uchun soliq to‘lovchining “my.soliq.uz” saytidagi shaxsiy kabinetida “YUSh onlayn-NKM va virtual kassa ma’lumotlari” sahifasidan “Tahrirlash” bo‘limiga kiriladi.
Qidiruv tizimiga chekning fiskal modul ID va raqamini kiritib tuzatiladigan chek topiladi. Ochilgan oynada chek ma’lumotlari tahrirlanadi.
Xususan, chek ma’lumotlarini tahrirlashda quyidagilarni o‘zgartirish mumkin:
- Mahsulotlar va xizmatlar identifikatsiya kodi (MXIK);
- miqdori;
- o‘lchov birligi;
- chek summasi;
- komitent STIRi;
- to‘lov turi (naqd pul yoki bank karta).
Barcha o‘zgartirishlar kiritilgandan so‘ng, faqat bitta fayl — tadbirkorlik subyektining holat yuzasidan batafsil tushuntirishi bayon etilgan rasmiy xati (muhrlangan firma blankida) ilova qilinishi lozim.
Tuzatish kiritish uchun yuborilgan cheklar hududiy davlat soliq boshqarmasida tuzilgan ishchi guruhi bilan kelishilgan holda o‘rganiladi.
Ko‘rib chiqish natijasi ijobiy deb baholansa, chek holati “qabul qilingan”ga o‘zgaradi. Rad etilgan taqdirda soliq organining izohiga ko‘ra, tuzatishlar kiritilib qayta yuborilishi lozim.
Yakunda, “Hisoblash” va “Jo‘natish” tugmasi bosiladi.
Ma’lumot uchun iste’molchilarga xarid summasidan 1 foiz qaytarilgan (keshbek) cheklar tahrirlanmaydi.
Izoh (0)