O‘zbekistonda harbiy ayollar uchun “To‘maris” ko‘krak nishoni ta’sis etildi

O‘zbekistonda harbiy ayollarni qo‘llab-quvatlash maqsadida “To‘maris” ko‘krak nishoni ta’sis etildi, deb xabar bermoqda “Dunyo” AA.

Prezidentining “To‘maris” ko‘krak nishonini ta’sis etish to‘g‘risidagi qaroriga ko‘ra, ushbu ko‘krak nishoni O‘zbekiston mudofaa qudratini yuksaltirish, jamiyatda hukm surayotgan millatlararo totuvlikni, tinchlik va barqarorlikni asrash, munosib hissa qo‘shayotgan ayol harbiy xizmatchilarni qo‘llab-quvvatlash maqsadida ta’sis etildi.

Qaror bilan “To‘maris” ko‘krak nishoni to‘g‘risidagi nizom va “To‘maris” ko‘krak nishoni, uning guvohnomasi tasdiqlandi.

Hujjatga ko‘ra, O‘zbekistan Markaziy bankining “Davlat belgisi” davlat unitar korxonasi tegishli vazirlik va idoralarning buyurtmalariga asosan “To‘maris” ko‘krak nishoni va uning guvohnomasini belgilangan tartibda tayyorlaydi.

“To‘maris” ko‘krak nishoni va uning guvohnomasini tayyorlash hamda mukofotlanganlarni taqdirlash bilan bog‘liq xarajatlar budjet mablag‘lari, budjetdan tashqari mablag‘lar va qonunchilikda taqiqlanmgan boshqa manbalar hisobidan amalga oshiriladi.

Ko‘krak nishoni vazirlik va idoralar rahbarlari (yoki ularning topshirig‘iga muvofiq, boshqa mas’ul shaxslar) tomonidan 14-yanvar — Vatan himoyachilari kuni bayrami arafasida tantanali ravishda topshiriladi.