Bola huquqlari bo‘yicha vakil Aliya Yunusova 18-noyabr kuni Fargona viloyat prokuraturasida 15 yoshli A.R. o‘limida ayblanayotgan va qamoqqa olingan voyaga yetmagan A.E. va K.S. bilan uchrashdi.
Farg‘ona viloyati Qo‘qon shahridagi Voyaga yetmaganlarga huquqiy yordam ko‘rsatish markazida saqlangan 9-sinf o‘quvchisi A.R. vafot etgandi. Huquqni muhofaza qiluvchi organlar tomonidan marhumning 17-oktabr kuni markazda vaqtincha saqlanayotgan 6 nafar bolalarga qo‘shilganidan so‘ng, ushbu bolalar yotoqxonasida xonadagi bolalar bilan o‘zaro gap talashib, janjal kelib chiqish oqibatida marhum A.R. do‘pposlanib unga og‘ir tan jarohati yetkazilgani aytilgandi.
O‘zaro suhbat davomida qo‘lga olingan A.E. va K.S. ularga qo‘yilgan aybni tan olgan va o‘zlariga nisbatan qiynoq, ruhiy va jismoniy bosim qo‘llanilmaganini, advokatlar bilan ta’minlashganini bildirgan.
Bolalar Ombudsmani huquqni muhofaza qiluvchi organlar vakillari bilan muloqotda bola huquqlari va manfaatlarini himoya qilish bo‘yicha o‘z tavsiyalarini berib o‘tgan.
Hozirda mazkur holat bo‘yicha Farg‘ona viloyat prokuraturasi tomonidan tergov harakatlari olib borilmoqda.
10-noyabr kuni Aliya Yunusova Farg‘ona viloyati Bolalarni himoya qilish masalalari kotibiyati hamkorligida Qo‘qon shahridagi IIB Voyaga yetmaganlarga ijtimoiy-huquqiy yordam ko‘rsatish markazining faoliyatini o‘rgangandi. Markazda monitoring davomida aniqlangan xato va kamchiliklar bartaraf etilishi yuzasidan tegishli vazirlik hamda idoralarga Bola huquqlari bo‘yicha vakilning taklif va tavsiyalari yuborilgan.
Mavzuga doir: Farg‘onada 15 yoshli bolaning o‘limi ortidan yana bir IIB xodimi ishdan olindi
Izoh (0)