Shavkat Mirziyoyev 21-noyabr kuni Qozog‘iston prezidenti Qosim-Jo‘mart To‘qayev bilan telefon orqali muloqoti qilib, prezidentlik saylovidagi g‘alabasi bilan tabrikladi.
Prezident matbuot xizmatining xabar qilishicha, davlat rahbari uni umumxalq saylovi muvaffaqiyatli o‘tgani va unda ishonchli g‘alaba qozongani bilan samimiy muborakbod etdi.
O‘zbekiston—Qozog‘iston yaxshi qo‘shnichilik, strategik sheriklik va ittifoqchilik munosabatlarini yanada mustahkamlashning dolzarb masalalari ko‘rib chiqildi. Bo‘lajak oliy darajadagi uchrashuvlarni tayyorlashga alohida e’tibor qaratildi.
Savdo, sanoat, energetika, transport va logistika, qishloq xo‘jaligi kabi ustuvor yo‘nalishlarda va iqtisodiyotning boshqa tarmoqlarida amaliy hamkorlikni kengaytirish muhimligi qayd etildi. Mintaqaviy hamkorlik masalalari yuzasidan ham fikr almashildi.
Qozog‘istonning amaldagi prezidenti Qosim-Jo‘mart To‘qayev 20-noyabr kuni bo‘lib o‘tgan prezidentlik saylovida g‘alaba qozongandi.
“Ochiq jamiyat” xalqaro mintaqaviy tadqiqotlar instituti ma’lumotlariga ko‘ra, To‘qayev 82,45 foiz, “Amanat” partiyasining Davlat siyosati instituti ma’lumotlariga ko‘ra — 85,52 foiz ovoz to‘pladi. “SOCIS-A” keng qamrovli ijtimoiy tadqiqotlar institutida bu ko‘rsatkich 82,02 foizni tashkil qildi.
Elboshi Nursulton Nazarboyev birinchilardan bo‘lib To‘qayevni saylovdagi g‘alabasi bilan tabrikladi.
Izoh (0)