«Ҳозирги болаларнинг кўчага чиқиб тўп тепишга қизиқиши пасайган. Видео-ўйинларга эътибор беришяпти» — Даврон Файзиев

«Дарё» интернет-нашри Тошкент шаҳри ҳокимлиги қошидаги Жамоатчилик кенгаши билан биргаликда «Маҳалла. Муаммо. Мулоҳаза» лойиҳасини тақдим этиб келмоқда. Лойиҳанинг 7-сон мавзуси «Маҳалла футболи» бўлиб, дастур меҳмони сифатида спорт журналисти ва шарҳловчи Даврон Файзиев таклиф этилди.

Суҳбат давомида бошловчи Фурқат Маҳмудхўжаев меҳмондан маҳаллаларда ташкил этилган кичик ҳажмли, сунъий қопламали футбол майдонларидан фойдаланиш шароитлари, болаларга майдончаларда бепул футбол ўйнаш бўйича берилган имкониятлар ҳақида сўради.

Тадбиркор ана шу майдонга пул киритдими, у ҳам моддий манфаатини ўйлайди, сарфлаган пулини чиқариб олиши лозим. Шу учун маҳаллалардаги катта ёшли инсонлар ҳам пул тўлаб футбол ўйнаяпти ва бу фойдали — соғлом турмуш тарзи таъминланяпти.

Аммо шунинг оқибатида стадионни болалар учун бепул қилиш ҳолати камайган, бу салбий томони, — дейди Даврон Файзиев.

Болалар олдин кўча чангитиб, оддий темирдан дарвоза ясаб, тупроқда футбол ўйнарди. Ҳозир ундай эмас, стадионларнинг бепул вақтини топиш керак; жамоа бўлиб бориб ўйнамаса, қимматроққа тушади.

Болаларнинг ўзида ҳам кўчада юриб тўп ўйнашга қизиқиш пасайгандек. Телефон, видео-ўйинлар, гаджетлар, компьютерга кўпроқ эътибор беришяпти. Шунчаки кўчага чиқиб, дўстлар йиғилиб, тўпни олиб тор кўчада бўлса ҳам ўйнаш ҳолатлари жуда камайиб кетган. Ва бу оммавийликка ҳам таъсир қиляпти барибир, — дея қайд этди меҳмон.

— Аввал футбол ўйнаганда йўлдан иккита машина чиқиб қолса, дарров йўл четига ўтиб турардик, кейин яна давом эттириларди. Ҳозир эса бир дақиқанинг ўзида иккита автомобиль ўтиб турса керак.

— Ҳозир деярли тўхтамайди ҳам автомобиллар, оқим катта. Болалар нафақат футбол, балки ўша оддий қувламачоқ, беркинмачоқ ўйинларини ҳам ўйнамай қўйишган.