Jahon banki tomonidan Davlatlarning texnologik tayyorgarligi indeksi — GovTech Maturity Index 2022 hisoboti e’lon qilindi. Unga ko‘ra, O‘zbekiston 198 davlat orasida 43-o‘rinni egalladi. Bu haqda Axborot texnologiyalari va kommunikatsiyalarini rivojlantirish vazirligi xabar bermoqda.
Ma’lumotlarga ko‘ra, bu ko‘rsatkichda mamlakat 2020-yilga nisbatan +37 pog‘onaga yuqorilagan.
Shuningdek, davlatni raqamli transformatsiyalash hamda davlat xizmatlarini raqamlashtirish sohasidagi yetakchi davlatlar “A” guruhiga kiritildi. Mazkur guruhga 69 ta davlat kiritilgan bo‘lib, yetakchi pog‘onalarni Koreya Respublikasi, Braziliya va Saudiya Arabistoni egallagan.
GovTech tashabbusi davlat xizmatlarini ko‘rsatish sifatini oshirish hamda davlat va aholi o‘rtasidagi elektron hamkorlik samaradorligini oshirish maqsadida 2020-yildan boshlab e’lon qilinadi.
Jahon bankining GovTech dasturi raqamli hukumatga kompleks yondashuvni aks ettiradi va to‘rtta asosiy yo‘nalishni o‘z ichiga oladi. Ular loyihalar, baholashlar va siyosiy muloqotlar orqali amalga oshiriladi.
GovTech Enablers indeksiga ko‘ra, O‘zbekiston dunyoda 4-o‘rinni egalladi (2020-yilga nisbatan +65 pog‘ona yuqori).
Ushbu ko‘rsatkich raqamli hukumat va davlat xizmatlari uchun doimiy qulay muhit yaratilishi, raqamli ko‘nikmalar sohasida moslashuvchan yaxlit hukumat yondashuvini o‘rnatish, davlat institutlari, qonunlar himoyasini ta’minlash bilan tavsiflanadi.
O‘zbekistonning ushbu GovTech indeksidagi o‘rni mahalliy raqamli mahsulotlarni rivojlantirish va raqamli transformatsiya loyihalarini amalga oshirish uchun xorijiy investitsiyalarni jalb qilish imkoniyatlarini ochib beradi.
Avvalroq XVJ O‘zbekistonda YIM o‘sish sur’ati pasayishini prognoz qilgani haqida xabar berilgandi.
Izoh (0)