Жаҳон банки томонидан Давлатларнинг технологик тайёргарлиги индекси — GovTech Maturity Index 2022 ҳисоботи эълон қилинди. Унга кўра, Ўзбекистон 198 давлат орасида 43-ўринни эгаллади. Бу ҳақда Ахборот технологиялари ва коммуникацияларини ривожлантириш вазирлиги хабар бермоқда.
Маълумотларга кўра, бу кўрсаткичда мамлакат 2020 йилга нисбатан +37 поғонага юқорилаган.
Шунингдек, давлатни рақамли трансформациялаш ҳамда давлат хизматларини рақамлаштириш соҳасидаги етакчи давлатлар «А» гуруҳига киритилди. Мазкур гуруҳга 69 та давлат киритилган бўлиб, етакчи поғоналарни Корея Республикаси, Бразилия ва Саудия Арабистони эгаллаган.
GovTech ташаббуси давлат хизматларини кўрсатиш сифатини ошириш ҳамда давлат ва аҳоли ўртасидаги электрон ҳамкорлик самарадорлигини ошириш мақсадида 2020 йилдан бошлаб эълон қилинади.
Жаҳон банкининг GovTech дастури рақамли ҳукуматга комплекс ёндашувни акс эттиради ва тўртта асосий йўналишни ўз ичига олади. Улар лойиҳалар, баҳолашлар ва сиёсий мулоқотлар орқали амалга оширилади.
GovTech Enablers индексига кўра, Ўзбекистон дунёда 4-ўринни эгаллади (2020 йилга нисбатан +65 поғона юқори).
Ушбу кўрсаткич рақамли ҳукумат ва давлат хизматлари учун доимий қулай муҳит яратилиши, рақамли кўникмалар соҳасида мослашувчан яхлит ҳукумат ёндашувини ўрнатиш, давлат институтлари, қонунлар ҳимоясини таъминлаш билан тавсифланади.
Ўзбекистоннинг ушбу GovTech индексидаги ўрни маҳаллий рақамли маҳсулотларни ривожлантириш ва рақамли трансформация лойиҳаларини амалга ошириш учун хорижий инвестицияларни жалб қилиш имкониятларини очиб беради.
Аввалроқ ХВЖ Ўзбекистонда ЯИМ ўсиш суръати пасайишини прогноз қилгани ҳақида хабар берилганди.
Изоҳ (0)