Mazali va foydali mevalardan tayyorlangan xavfsiz ichimliklar nafaqat sog‘lom bo‘lishga, balki tanada energiya miqdorining oshishiga yordam beradi. Shifokorlar energetik ichimliklar ichishni tavsiya qilmaydi: birinchidan, ular juda ko‘p miqdorda kofeinni o‘z ichiga oladi, ikkinchidan, ko‘plab energetik ichimliklar shakar yoki uning o‘rnini bosuvchi moddalardan iborat bo‘ladi. “Noviy ochag” nashri uyda tayyorlash mumkin bo‘lgan quvvat beruvchi ichimliklar retseptini taqdim etdi.
Ko‘katlardan tayyorlanadigan smuzi retsepti
Ko‘katlar va sabzavotlar sog‘liq uchun foydali, shu bilan birga quvvat beruvchi va uning tarqalishini ta’minlaydigan juda ko‘p foydali moddalarni o‘z ichiga oladi. Quyida sog‘lig‘ingizga hech qanday zarar yetkazmasdan har kuni tayyorlashingiz mumkin bo‘lgan oddiy smuzi retsepti keltiriladi.
Kerakli masalliqlar:
- bir hovuch ismaloq
- yarimta tozalangan limon
- taxminan 2,5 sm yangi uzilgan zanjabilning bir bo‘lagi,
- kichkina dasta kinza
- bir bog‘ petrushka
- bir stakan suv,
- bir oz muz.
Barcha mahsulotlarni qo‘shib blenderda aralashtirib oling va ta’bingizga qarab muz bo‘laklarini qo‘shing.
Banan va olmadan tayyorlanadigan quvvat beruvchi kokteyl
Olma — tanadagi energiyani ikki karra oshirishga yordam beruvchi mahsulotdir: ushbu meva tarkibidagi antioksidantlar tufayli tanaga quvvat beradi va organizmda asta-sekin ajralib chiqadigan vitaminlar va minerallar sabab energiyani uzoq vaqt saqlashga yordam beradi. Bundan tashqari, yong‘oq moyi ham qondagi shakar miqdorini me’yorida saqlashga yordam beradi, shuning uchun ko‘proq harakat qilish mumkin.
Kerakli masalliqlar:
- 2 dona o‘rtacha kattalikdagi olma
- 2 dona banan
- bir stakanning to‘rtdan bir qismi miqdorida sut
- 2 qoshiq yong‘oq moyi
Mevalarni tozalang, qolgan mahsulotlarni qo‘shib blender yordamida aralashtiring. Ichimlikni sovutilgan holda iste’mol qiling.
Rezavor mevalar va matchadan tayyorlanadigan ichimlik retsepti
Tabiiy fruktozaga boy rezavor mevalar kun davomida tanaga energiyani me’yorida taqsimlashga yordam beradi. Kofein va antioksidantlarga boy matcha — yashil choy kukuni esa kuch-quvvatni bir zumda oshiradi. Bu ichimlikni qahva o‘rniga ertalab yoki tushdan keyin, kuch-quvvat pasayib ketganda ichish mumkin.
Kerakli masalliqlar:
- bir stakan yangi uzilgan yoki muzlatilgan rezavor mevalar
- 2 qoshiq matcha
- bitta laym yoki limon sharbati
- 1 stakan suv
Barcha mahsulotlarni blender yordamida yaxshilab aralashtirib oling va sovutilgan holda iste’mol qiling.
Tarvuzli smuzi
Tarvuz tanani sog‘lomlashtirishga, suyuqlik bilan ta’minlashga yordam beradi (chanqash insonni charchatishi mumkin) va yurakning normal ishlashi uchun juda muhim bo‘lgan kaliy yetishmovchiligini to‘ldiradi. Qulupnay tarkibida ko‘p miqdorda bo‘lgan antioksidantlar insonni tetik va quvvatli his qilishiga yordam beradi.
Kerakli masalliqlar:
- limon sharbati bilan yarim stakan suv
- ikki bo‘lak tarvuz
- bir stakan yangi uzilgan yoki muzlatilgan qulupnay
- yarimta laym
Barcha mahsulotlarni blender yordamida aralashtiring va ichimlikni muzlatilgan holatda dasturxonga torting.
Rezavor mevalar va olchadan tayyorlanadigan quvvat beruvchi ichimlik retsepti
Gilos va anor antioksidantlarga boy, ular inson tanasini quvvatlantiradi, zanjabil esa nafaqat kayfiyatni yaxshilaydi, balki tanadagi samaradorlikni oshirishga yordam beradigan endorfin ishlab chiqarishni kuchaytiradi.
- yarimta anor
- bir stakan kokos sharbati,
- yarim stakan olcha sharbati
- chorak choy qoshiqda maydalangan zanjabil
- ta’bga ko‘ra yangi uzilgan qulupnay yoki malina
Barcha mahsulotlarni blender yordamida aralashtiring. Ichimlikka ta’bga ko‘ra bir bo‘lak limon va muz qo‘shishingiz mumkin.
Mavzuga doir:
Izoh (0)