Мазали ва фойдали мевалардан тайёрланган хавфсиз ичимликлар нафақат соғлом бўлишга, балки танада энергия миқдорининг ошишига ёрдам беради. Шифокорлар энергетик ичимликлар ичишни тавсия қилмайди: биринчидан, улар жуда кўп миқдорда кофеинни ўз ичига олади, иккинчидан, кўплаб энергетик ичимликлар шакар ёки унинг ўрнини босувчи моддалардан иборат бўлади. «Новий очаг» нашри уйда тайёрлаш мумкин бўлган қувват берувчи ичимликлар рецептини тақдим этди.
Кўкатлардан тайёрланадиган смузи рецепти
Кўкатлар ва сабзавотлар соғлиқ учун фойдали, шу билан бирга қувват берувчи ва унинг тарқалишини таъминлайдиган жуда кўп фойдали моддаларни ўз ичига олади. Қуйида соғлиғингизга ҳеч қандай зарар етказмасдан ҳар куни тайёрлашингиз мумкин бўлган оддий смузи рецепти келтирилади.
Керакли масаллиқлар:
- бир ҳовуч исмалоқ
- яримта тозаланган лимон
- тахминан 2,5 см янги узилган занжабилнинг бир бўлаги,
- кичкина даста кинза
- бир боғ петрушка
- бир стакан сув,
- бир оз муз.
Барча маҳсулотларни қўшиб блендерда аралаштириб олинг ва таъбингизга қараб муз бўлакларини қўшинг.
Банан ва олмадан тайёрланадиган қувват берувчи коктейл
Олма — танадаги энергияни икки карра оширишга ёрдам берувчи маҳсулотдир: ушбу мева таркибидаги антиоксидантлар туфайли танага қувват беради ва организмда аста-секин ажралиб чиқадиган витаминлар ва минераллар сабаб энергияни узоқ вақт сақлашга ёрдам беради. Бундан ташқари, ёнғоқ мойи ҳам қондаги шакар миқдорини меъёрида сақлашга ёрдам беради, шунинг учун кўпроқ ҳаракат қилиш мумкин.
Керакли масаллиқлар:
- 2 дона ўртача катталикдаги олма
- 2 дона банан
- бир стаканнинг тўртдан бир қисми миқдорида сут
- 2 қошиқ ёнғоқ мойи
Меваларни тозаланг, қолган маҳсулотларни қўшиб блендер ёрдамида аралаштиринг. Ичимликни совутилган ҳолда истеъмол қилинг.
Резавор мевалар ва матчадан тайёрланадиган ичимлик рецепти
Табиий фруктозага бой резавор мевалар кун давомида танага энергияни меъёрида тақсимлашга ёрдам беради. Кофеин ва антиоксидантларга бой матча — яшил чой кукуни эса куч-қувватни бир зумда оширади. Бу ичимликни қаҳва ўрнига эрталаб ёки тушдан кейин, куч-қувват пасайиб кетганда ичиш мумкин.
Керакли масаллиқлар:
- бир стакан янги узилган ёки музлатилган резавор мевалар
- 2 қошиқ матча
- битта лайм ёки лимон шарбати
- 1 стакан сув
Барча маҳсулотларни блендер ёрдамида яхшилаб аралаштириб олинг ва совутилган ҳолда истеъмол қилинг.
Тарвузли смузи
Тарвуз танани соғломлаштиришга, суюқлик билан таъминлашга ёрдам беради (чанқаш инсонни чарчатиши мумкин) ва юракнинг нормал ишлаши учун жуда муҳим бўлган калий етишмовчилигини тўлдиради. Қулупнай таркибида кўп миқдорда бўлган антиоксидантлар инсонни тетик ва қувватли ҳис қилишига ёрдам беради.
Керакли масаллиқлар:
- лимон шарбати билан ярим стакан сув
- икки бўлак тарвуз
- бир стакан янги узилган ёки музлатилган қулупнай
- яримта лайм
Барча маҳсулотларни блендер ёрдамида аралаштиринг ва ичимликни музлатилган ҳолатда дастурхонга тортинг.
Резавор мевалар ва олчадан тайёрланадиган қувват берувчи ичимлик рецепти
Гилос ва анор антиоксидантларга бой, улар инсон танасини қувватлантиради, занжабил эса нафақат кайфиятни яхшилайди, балки танадаги самарадорликни оширишга ёрдам берадиган эндорфин ишлаб чиқаришни кучайтиради.
- яримта анор
- бир стакан кокос шарбати,
- ярим стакан олча шарбати
- чорак чой қошиқда майдаланган занжабил
- таъбга кўра янги узилган қулупнай ёки малина
Барча маҳсулотларни блендер ёрдамида аралаштиринг. Ичимликка таъбга кўра бир бўлак лимон ва муз қўшишингиз мумкин.
Мавзуга доир:
Изоҳ (0)