Anqaraning AQSHdan F-16 qiruvchi samolyotlarini sotib olishi bilan bog‘liq muammolar yaqin orada hal bo‘ladi. Bu haqda Turkiya prezidenti Rajab Toyyib Erdo‘g‘on Indoneziyada bo‘lib o‘tgan G20 sammiti doirasida AQSH prezidenti Jo Bayden bilan uchrashuvdan so‘ng ma’lum qildi, deb yozmoqda Anadolu.
Erdo‘g‘onning so‘zlariga ko‘ra, Bayden unga bu masalada “vaziyat ijobiy” ekanini aytgan.
“Umid qilamanki, tashqi ishlar va mudofaa vazirlarimiz ushbu jarayonni yaqindan kuzatib borishi bilan biz F-16 muammosini tez orada hal qilamiz”, — dedi Turkiya rahbari.
AQSH va Turkiya rahbarlarining uchrashuvida ikki tomonlama munosabatlar, savdo va xavfsizlik masalalari ham muhokama qilingan.
Sentabr oyi oxirida Turkiyaning hukmron partiyasi a’zolaridan iborat delegatsiya AQSHdan F-16 sotib olish bo‘yicha muzokaralar olib borish uchun Vashingtonga borgan edi. Shu bilan birga, Erdo‘g‘onning matbuot kotibi Ibrohim Kalin agar AQSH F-16 samolyotlarini sotishdan bosh tortsa, Anqara Britaniyaning Eurofighter Typhoon samolyotlarini xarid qilishi mumkinligi haqida aytgandi.
Avgust oyida Anqara Vashingtondan F-16 qiruvchi samolyotlarining xaridi masalasini tezroq hal etishni talab qilgan. Turkiya 40 ta F-16 qiruvchi samolyotini sotib olmoqchi va mamlakat armiyasida ishlatilayotgan 80 ta shunday qiruvchini modernizatsiya qilmoqchi.
Izoh (0)