Россияда сафарбарлик билан боғлиқ ҳолда юзага келаётган ишчи кучи танқислиги сабаб Москва муҳим соҳаларда ишлаётган ўзбек муҳожирлари учун квотани бекор қилди.
2021 йилдан бери амалда бўлган квота Ўзбекистондан фақат 11 минг ишчига уюшган миграция схемалари доирасида қурилиш ва агросаноат соҳаларида ишлаш имконини берарди. 10 ноябрь куни Россия ҳукумати уни бекор қилди.
Квоталар бир марталик асосда ёлланган миллионлаб оддий ишчиларга тааллуқли эмас. Россияда икки миллионга яқин ўзбекистонлик ишлаётгани тахмин қилинади.
Энди эса Россия президенти Владимир Путиннинг Украинадаги урушга эркакларни сафарбар қилиш ҳақидаги буйруғи билан юзага келган ишчи кучи танқислигини бартараф этиш мақсадида ўзбек муҳожирларини жалб қилиш учун ушбу квоталар олиб ташланмоқда.
«Россия саноат корхоналарининг учдан бир қисми рекорд даражадаги ишчи кучи етишмаслигига дуч келиши мумкин», — деб ёзади «Коммерсантъ» нашри Гайдар номидаги Иқтисодий сиёсат институти экспертларига таяниб. Ҳисоботда айтилишича, Россия меҳнат бозори 1993 йилдан бери энг катта танқисликни бошдан кечирмоқда.
Москва, шунингдек, ишчилардан Covid-19 га қарши эмланганлик сертификати ёки манфий тест натижасини тақдим этиш талабини бекор қилди.
Путиннинг сафарбарлик ҳақидаги буйруғидан олдин ҳам ўзбекистонлик қурувчилар учун ажратилган квотанинг ярмидан камроғи бажарилган эди. 13,5 минг малакали ишчига квота ажратилган бўлса-да, сентябрь ойининг бошларида Россияда фақат 4,5 минг киши ишлаган.
Россия марказий осиёлик муҳожирларни Украина билан урушга жалб қилишга уринаётгани ҳақидаги хабарлар ҳам уларни Россияга бориш масаласида ўйлантирмоқда.
«Росстат» маълумотларига кўра, ўзбекистонликлар Россияда қолишга аввалгига қараганда камроқ қизиқиш билдирмоқда. 2021 йилнинг саккиз ойида Ўзбекистоннинг 35,7 минг фуқароси Россияга кирган, 19,9 минг киши эса чиқиб кетган. Жорий йилнинг худди шу даврида 33,9 минг киши мамлакатга кўчиб ўтган бўлса, ундан анча кўпроқ — 47,6 киши чиқиб кетган.
Уруш оқибатида Жаҳон банки бу йил муҳожирларнинг пул ўтказмалари кескин камайишини прогноз қилмоқда. Марказий Осиёдаги оилаларнинг кўпчилиги бу ўтказмаларга қарам.
Май ойида Россиядан Ўзбекистонга пул ўтказмалари 21 фоизга, Тожикистонга 22 фоизга ва Қирғизистонга 32 фоизга қисқариши тахмин қилинганди. Ўтган йили Ўзбекистонга пул ўтказмалари ялпи ички маҳсулотнинг 13 фоиздан ортиғини ташкил этди; Жаҳон банки маълумотларига кўра, Тожикистон ва Қирғизистон учун бу кўрсаткич ЯИМнинг тахминан учдан бир қисмини ташкил қилган.
Марказий осиёлик муҳожирлар Россиядан бошқа давлатларда ҳам омадини синаб кўрмоқда, айримлар Brexit билан боғлиқ ишчи кучи танқислигини тўлдириш учун бу ёзда Буюк Британияда мева-сабзавотлар йиғиш билан шуғулланган.
Изоҳ (0)