Ўзбекистон халқ артисти Эркин Комилов халқ ардоғидаги марҳум актёр Шукур Бурҳоновнинг шогирди бўлгани, театр институтига кириши, марҳум рафиқалари, ўзи таъсирланиб ўйнаган роли қайси экани, қандай инсонлардан нафратланиши ҳақида гапирди.
Эркин Комилов театр олийгоҳига киришдаги қийинчиликлари ҳақида
1964 йили Тошкент театр ва рассомчилик институтига келганимда, 244 киши ҳужжат топширган эди, кейин эса драма маҳорати йўналишига 11 кишини олишини эшитганман. Юрагим шув этган, бир қарасам сочлари тақимини ўпган Гулчеҳра Жамилова, Гуля Муҳаммедова, Каромат, Лола бор бўлган, болаларнинг ҳаммаси бақувват. Мен эса қишлоқдан келганман, шайтон «ҳужжатингни олиб кет», раҳмон эса «тўхта», деган. Кейин кириб ижрони топшириб чиқдим, иккита имтиҳон бўларди, икки марта «эланарди».
Биринчи имтиҳондан кейин 33 киши қолдик, қарасам фамилиям турибди, хурсанд бўлдим. Иккинчи марта яна кирдим, шундан сўнг 11 кишининг орасидан 7-бўлиб турибман. Шундай қилиб имтиҳондан ўтиб кетганман. Институтда ўқиб юрган пайтларимиз, 1966 йили ер қимирлади, шунда Ўзбекистон халқ артисти Тошхўжа Хўжаев мени, Гулчеҳра Жамилова, Ҳожиакбар Нурматов, учаламизни ишга олган. Ўша пайт биз учинчи курсда ўқир эдик.
«Шукур Бурҳоновнинг нигоҳига тушдим, уйига борганимда фақат санъат ва театр ҳақида гаплашар эдик»
Қандайдир Шукур Бурҳоновнинг нигоҳига тушган эканман, нима бўлса отинг нима, дердилар, Эркин десам, машинага ўтир, дердилар. Уйга борардик, ўзи билан яқин олиб юрарди. «Ҳамза» театрида ўқиб юрган пайтларимда борганимда «Мирзо Улуғбек» театрини кўрганман. Шу пайт биринчи театрга тушишим эди.
Шукур аканинг истеъдодига ҳайратомуз боққанман, кейин шу инсон ҳаётда қанақа экан, деб театр катта дарвозасининг олдида кутиб турганман. Ёмғир савалаб ёғиб турган эди, «Москвич» машинасида, грузинча бош кийимни кийиб чиқиб келган. Салом берганман, алик олиб кетган, шу билан кўринмай кетгунча орқасидан қараб турганман.
Кейин шу инсоннинг нигоҳига тушдим, уйига борганимда фақат санъат ва театр ҳақида гаплашар эдик. Тўғри, ўша пайтда мен қишлоқ фарзанди бўлганим учун ерларни чопиб, нима иш бўлса, йўқ демасдан шуни қилар эдим. Тоза иш қилганим учун ҳам Шукур ака мени ёқтириб қолган. Уларнинг ёнида юриб, саҳнадаги одоб-қоидаларни ўрганардик. Суратга олиш ишларининг тайёргарлик жараёнларига вақтида келишни, саҳнада қандай юришни, каттага ҳурмат, кичикка иззат қилишни, гарчи бизга айтмаган бўлишса ҳам, шуларни кўриб ўрнак олганмиз.
«Ҳозирги аёлим Маҳбубанинг баҳоси йўқ, менга қарайди, врачим ҳам, ошпазим ҳам Маҳбуба»
Фотима ва Зуҳра қизларимнинг онаси юрак хуружи билан 24 ёшида вафот этган. Болалар менда қолиб кетди, у кунлар ўтди. Кейин устозим Шукур Бурҳоновнинг ёрдами билан болалар театрида ишлайдиган Мўътабар исмли бир қизга уйландим. Аллоҳ фарзандлар берди, 44 ёшида у ҳам вафот этди. Беш қизимни ўзим узатдим, ўғилларимни тўй қилдим.
Ундан кейин бари бир эркак киши уйланмаса бўлмас экан, уйнинг ишлари, ўзим кўчада юрсам, овқат, дазмол қилиш дегандек, аёл киши эркакни орқасида қолгани яхши экан. Ўзимдан ўтганини ўзим биламан, мана ҳозир ҳеч нарсани кўрмагандек бўлиб кетдим. Ҳозирги аёлим Маҳбубанинг баҳоси йўқ, менга қарайди, врачим ҳам, ошпазим ҳам Маҳбуба.
«Шифокорларни чақиришган, укол қилгандан кейин ўзимга келганман, тамоман ўзимдан чиқиб кетган эканман»
«Гирдоб» спектакли қўйилган вақтда бир саҳнаси бор эди, Муҳаммад чатоқ Азиз Қосимовнинг олдига келади. Мен сизни ақлли бола деб юрсам, сизнинг ақлингиз йўқ экан-ку, дейди. У эса нимагалигини сўрайди, Муҳаммад эса келинимни хафа қилиб, нимага уйдан чиқиб кетдингиз, деб айтади. Азиз ичига олади, сўраманг, Муҳаммад ака, дейди. Чунки унга Салтанат Йўлдош билан бирга хиёнат қилганини айтганда, костюмини елкасига олади ва ётоқхонадан чиқиб кетади.
Азиз Қосимов қаерга кетаётганини билмайди. У шунинг учун айтмайди, бировга айтмайман деб қасам ичганман, бу бировга айтадиган гап эмас, дейди. Шу пайт ичимдан бир нарса келди, суратга олиш жараёнлари бўляпти, ўзимни билмай қолганман. Шифокорларни чақиришган, укол қилгандан кейин ўзимга келганман, тамоман ўзимдан чиқиб кетган эканман. Шундай нарса бўлган.
«Тамагир инсонларни ёқтирмайман, бировга яхши кўриниш учун ҳамма нарсани ичига ютиш ҳам яхши эмас»
Шундай нарсалар бўладики, кечириб бўлмайди. Кечирдим деганингизда ҳам, виждонингиз қийнаб туради. Эркак киши аёл кишига қўл кўтариши яхши иш эмас, қўлимни уриб қўлтиғимга урдим, дейилади. Риёкор, товламачи, бировни ҳаққидан қўрқмайдиган инсонлар бор, шундай дориламон замонда нолийдиган одамлар бор, шулардан нафратланаман. Шуларни ёмон кўраман.
Тамагир инсонларни ёқтирмайман, бировга яхши кўриниш учун ҳамма нарсани ичига ютиб кетиш ҳам яхши эмас. Кўплаб инсонларни кўрдик, кўряпмиз. Ота-она, устознинг дуосини олганини ҳам, олмаганини ҳам кўряпман. Кимда ғам йўқ, ҳаммада ташвиш бор.
Мавзуга доир:
- Instagram: Қимматбаҳо машина харид қилган Зиёда, 61 ёшида ўғилли бўлган Эркин Комилов, журналист туғилган кунида жам бўлган юлдузлар.
- «Ким қилганини Ёдгор билади, мен ҳам биламан». Эркин Комилов «Шайтанат»нинг нима учун «запрет»га тушгани ҳақида гапирди (видео).
- Эркин Комилов Ислом Каримов ҳақидаги хотиралари билан бўлишди (видео).
- Эркин Комилов: Онам йигирма икки фарзандни дунёга келтирган, мен ўн тўққизинчисиман.
Изоҳ (0)