Ukraina ichki ishlar vaziri Denis Monastirskiy huquq-tartibot idoralari Xerson viloyati hududida rossiyalik harbiylar tomonidan o‘ldirilgan 63 kishining jasadini topgani haqida ma’lum qildi.
“Hozir tergovchilar ularni tekshirmoqda va qiynoqqa solish bo‘yicha barcha faktlarni aniqlamoqda, guvohlarni topmoqda, o‘lganlarning jasadlari eksgumatsiya qilinmoqda”, — deb Monastirskiyning so‘zlaridan iqtibos keltirgan IIV matbuot xizmati.
Vazirning so‘zlariga ko‘ra, hozirgacha Xerson viloyati hududida sodir etilgan harbiy jinoyatlar bo‘yicha 436 ta jinoiy ish qo‘zg‘atilgan. Bundan tashqari, huquq-tartibot idoralari Rossiya harbiylari tomonidan mahbuslar saqlab turilgan 11 ta qamoqxonani aniqladi — ulardan kamida to‘rttasida qiynoq qo‘llangan.
Monastirskiy qidiruv endigina boshlanganini, yana ko‘plab “zindonlar va qabristonlar” topilishi mumkinligini ta’kidladi.
9-noyabr kuni Rossiya mudofaa vaziri Sergey Shoygu urushning birinchi kunlarida Rossiya tomonidan bosib olingan Xersondan qo‘shinlarni olib chiqishni buyurdi. Ikki kundan keyin Ukraina Qurolli kuchlari shaharga kirdi. 14-noyabr kuni Ukraina prezidenti Vladimir Zelenskiy ham Xersonga tashrif buyurdi. U Xerson viloyatida “Rossiya armiyasi mamlakatning boshqa mintaqalaridagi kabi o‘zidan vahshiyliklar qoldirganini” aytdi.
Izoh (0)