Мьянма ҳарбийлари мамлакат миллий байрами муносабати билан қабул қилинган амнистияга мувофиқ 6000 кишини, жумладан бир қанча хорижликларни қамоқдан озод қилди, деб хабар бермоқда Reuters.
Озод қилинганлар орасида Мьянманинг собиқ давлат маслаҳатчиси, мухолифатдаги «Демократия учун Миллий лига» партияси раҳбари, тинчлик бўйича Нобель мукофоти совриндори (1991 йилда берилган) Аун Сан Су Чжи ва унинг иқтисодий сиёсат бўйича маслаҳатчиси бўлган австралиялик иқтисодчи Шон Тюрнел ҳам бор.
Сан Су Чжи ўндан ортиқ айбловлар бўйича 20 йилга қамалган эди. 2016 йилдан 2021 йилгача у Мьянма давлат маслаҳатчиси ва ташқи ишлар вазири лавозимларида ишлаган. Ўтган йилнинг февраль ойида мамлакатда давлат тўнтариши содир бўлиб, ҳукумат ҳарбийлар назоратига ўтди. Тюрнел давлат сири ҳақидаги қонунни бузганликда айбланди.
Шунингдек, норозилик намойишларини қўзғатганлик айби билан ўн йилга қамалган япониялик режиссёр Тору Кубота ва иммиграция қоидаларини бузганликда айбланган Буюк Британиянинг Мьянмадаги собиқ элчиси Вики Боуман ҳам озодликка чиқди.
Мьянмадаги давлат тўнтаришидан сўнг норозилик намойишлари бошланган, улар давомида камида 114 киши ҳалок бўлган эди, деб ёзмоқда Reuters ва Myanmar Now. AFP 90 га яқин қурбонлар ҳақида хабар берган. Ҳокимиятга келган ҳарбийлар томонидан тузилган Давлат маъмурий кенгаши 2021 йилнинг август ойида муваққат ҳукумат тузилганини эълон қилди.
Мавзуга доир: Мьянмада ҳарбийлар 4 нафар мухолифатчини қатл қилди
Изоҳ (0)