Kiyev don bitimi 120 kunga uzaytirilganini e’lon qildi

Ukrainadan Qora dengiz orqali qishloq xo‘jalik mahsulotlari olib chiqib ketilishini ta’minlovchi don bitimi 120 kunga uzaytiriladi, deya ma’lum qildi mamlakat prezidenti Vladimir Zelenskiy o‘z Twitter’ida.

“BMT bosh kotibi Antoniu Guterrish va Turkiya prezidenti Rajab Toyyib Erdo‘g‘on bilan birga oziq-ovqat inqiroziga qarshi global kurash bo‘yicha bosh qarorni qabul qildik”, — deb yozdi u.

Ukraina infratuzilma vaziri Aleksandr Kubrakov Twitter’da qo‘shimcha qilishicha, Kiyev bitimni bir yilga uzaytirish (avvalroq xuddi shu taklifni Anqara bildirgandi) va uning qamrovini kengaytirib, Nikolayev portini ham qo‘shish taklifini bildirgan. Hozirda don Odessa, Janubiy va Chernomorsk portlaridan tashiladi.

Bloomberg nashri 15-noyabr kuni Moskva ham, katta ehtimol bilan, don kelishuvini uzaytirishi haqida manbalariga tayanib xabar bergandi. “RIA Novosti” va “TASS” manbalari 17-noyabr kuni ma’lum qilishicha, bitimni uzaytirish bo‘yicha muzokaralar hali davom etmoqda. Don kelishuvining amal qilish muddati 19-noyabrda tugashi kerak.

Kelishuv 2022-yil iyulida Istanbulda imzolangandi. Turkiya va BMT vositachilik qilgan, Rossiya va Ukraina bir-biri bilan emas, balki ular bilan bitim tuzgan edi.

Hujjat ikkita qismdan iborat bo‘lib, birinchisi Ukraina qishloq xo‘jalik mahsulotlarini chiqarib ketish bilan, boshqasi esa Rossiyaning shunday mahsulotlari hamda o‘g‘itlari eksportiga cheklovlarni bekor qilish bilan bog‘liq bo‘lgan.