АҚШ президенти Жо Байден Украина президенти Владимир Зеленскийнинг Польшага қулаган ракеталар Украинага тегишли эмаслиги ҳақидаги баёнотига муносабат билдирди.
«Бу далил эмас», — деди Америка раҳбари.
16 ноябрь куни кечқурун Зеленский журналистлар билан суҳбатда ракеталар Украинага тегишли эмаслигини айтганди.
«Бу жиддий воқеа. Бу бизнинг ракетамиз ёки ракета зарбамиз эмаслигига шубҳа қилмайман. Ишончим комилки, бу бўйича олиб борилаётган терговда иштирок этишимиз керак. Адолатли бўлишимизни хоҳлайман. Агар ракета Украина ҳаво мудофаасига тегишли бўлса, бу далилларни кўрмоқчиман. Авваламбор бизга терговга қўшилишга ва сизда бор маълумотлар билан танишишга рухсат беринг», — деди у
15 ноябрь куни Польшанинг Украина билан чегарадош Пшеводов қишлоғига ракеталар қулаган, оқибатда 2 киши ҳалок бўлган эди. Бу воқеа Украина ҳудуди оммавий ракета зарбаларига учраган куни юз берди.
Дастлаб, Associated Press агентлиги Америка разведкасидаги манбага таяниб, Польшага қулаган ракеталар Россияга тегишли бўлиши мумкинлиги ҳақида хабар берганди. Польша Ташқи ишлар вазирлиги ҳам уларнинг «Россияда ишлаб чиқарилган»ини тасдиқлаган. Шу билан бирга, Польша президенти Анжей Дуда Варшавада ракеталарни ким учиргани ҳақида маълумот йўқлигини таъкидлади.
Пентагон матбуот котиби Пет Райдер журналистларга ракеталарнинг кимга тегишли эканини ҳали тасдиқлай олмаслигини айтган. АҚШ президенти Жо Байден ҳам уларнинг Россиядан учирилгани ҳозирча рад этилаётгани ҳақида гапирди.
Кейинроқ АП 3 нафар америкалик расмийга таяниб, Польшада қулаган ракеталар Россия ракеталарини уриб тушириш учун Украина Қуролли кучлари томонидан отилган, деб хабар берди.
Ўз навбатида Россия Мудофаа вазирлиги ҳам ракеталар Украина армиясига қарашли деб даъво қилмоқда.
Изоҳ (0)