O‘zbekiston elchisi Abdulaziz Oqqulov BAAning Air Arabia aviakompaniyasi tijorat menejeri Akram al-Ismoil boshchiligidagi delegatsiya bilan muzokaralar o‘tkazdi, deb xabar bermoqda “Dunyo” axborot agentligi.
Qayd etilishicha, O‘zbekiston va BAA aviatsiya idoralari kelishuviga muvofiq, Air Arabia aviakompaniyasi shu yil 7-dekabrdan boshlab haftasiga 2 marotaba Abu-Dabi—Toshkent—Abu-Dabi yo‘nalishida parvozlarni yo‘lga qo‘yadi. Kelgusida ushbu qatnovlarni haftasiga 7 martagacha oshirish mo‘ljallanmoqda.
Uchrashuvda ushbu havo qatnovlarini keng jamoatchilik o‘rtasida targ‘ib qilish, O‘zbekistonning boshqa shaharlariga parvozlarni amalga oshirish imkoniyatlari, mamlakatda yetishtirilgan mahsulotlarni BAAga eksport qilish imkoniyatlari atroflicha muhokama qilingan.
Air Arabia vakillari yuklarni tashish bilan bog‘liq batafsil ma’lumotlarni qo‘shimcha ravishda taqdim qilishni, 2023-yil davomida aviakompaniyaning Abu-Dabidagi tayanch aeroporti ixtiyoridagi samolyotlar soni 8 tadan 15 taga ko‘payishi kutilayotgani va shunga muvofiq Samarqand yoki Buxoro shaharlariga parvozlarni yo‘lga qo‘yishni rejalashtirilayotganini ma’lum qilgan.
Muhokamalar chog‘ida, shuningdek, Air Arabia hamkorlari imkoniyatlaridan foydalangan holda Yevropadan O‘zbekistonga sayyohlarni jalb etish masalalari yuzasidan ham fikr almashilgan.
BAA tomoni joriy yil 18-noyabr kuni ochilishi kutilayotgan Shayx Zoid meros festivalida O‘zbekiston pavilyoniga taklif etilgan. Yangi aviaqatnovni mazkur pavilyon orqali ham keng targ‘ib qilishga kelishib olingan.
Izoh (0)