Ўзбекистон элчиси Абдулазиз Оққулов БААнинг Air Arabia авиакомпанияси тижорат менежери Акрам ал-Исмоил бошчилигидаги делегация билан музокаралар ўтказди, деб хабар бермоқда «Дунё» ахборот агентлиги.
Қайд этилишича, Ўзбекистон ва БАА авиация идоралари келишувига мувофиқ, Air Arabia авиакомпанияси шу йил 7 декабрдан бошлаб ҳафтасига 2 маротаба Абу-Даби—Тошкент—Абу-Даби йўналишида парвозларни йўлга қўяди. Келгусида ушбу қатновларни ҳафтасига 7 мартагача ошириш мўлжалланмоқда.
Учрашувда ушбу ҳаво қатновларини кенг жамоатчилик ўртасида тарғиб қилиш, Ўзбекистоннинг бошқа шаҳарларига парвозларни амалга ошириш имкониятлари, мамлакатда етиштирилган маҳсулотларни БААга экспорт қилиш имкониятлари атрофлича муҳокама қилинган.
Air Arabia вакиллари юкларни ташиш билан боғлиқ батафсил маълумотларни қўшимча равишда тақдим қилишни, 2023 йил давомида авиакомпаниянинг Абу-Дабидаги таянч аэропорти ихтиёридаги самолётлар сони 8 тадан 15 тага кўпайиши кутилаётгани ва шунга мувофиқ Самарқанд ёки Бухоро шаҳарларига парвозларни йўлга қўйишни режалаштирилаётганини маълум қилган.
Муҳокамалар чоғида, шунингдек, Air Arabia ҳамкорлари имкониятларидан фойдаланган ҳолда Европадан Ўзбекистонга сайёҳларни жалб этиш масалалари юзасидан ҳам фикр алмашилган.
БАА томони жорий йил 18 ноябрь куни очилиши кутилаётган Шайх Зоид мерос фестивалида Ўзбекистон павильонига таклиф этилган. Янги авиақатновни мазкур павильон орқали ҳам кенг тарғиб қилишга келишиб олинган.
Изоҳ (0)