Ijtimoiy tarmoqlarda 16-noyabr, chorshanba kuni Toshkent shahrida fuqarolarning majburan ko‘chirilayotgani aks etgan videotasvirlar tarqaldi. MIB axborot xizmati rahbari esa ijro ishlarining qonuniy tarzda amalga oshirilganini “Daryo”ga ma’lum qildi.
Ijro ishi sud qarori asosida qonuniy tamomlangan.MIB axborot xizmatining ma’lumot berishicha, 2022-yilning 16-noyabr kuni olib borilgan ijro harakatlari davrida, qarzdorlar xonadondan majburiy tartibda ko‘chirilib, xonadon kaliti undiruvchi Plitindustrybuilding MCHJ vakiliga topshirilgan. Ijro ishi yurituvi “Sud hujjatlari va boshqa organlar hujjatlari ijro etish to‘g‘risida”gi qonunning 41-moddasiga asosan amalda tamomlangan.Joriy yilning 16-noyabr kuni ijtimoiy tarmoqlarda fuqarolar ogohlantirishsiz majburan ko‘chirilayotgani haqidagi video xabarlar tarqatildi.
Ma’lum bo‘lishicha, fuqarolik ishlari bo‘yicha Mirzo Ulug‘bek tumanlararo sudining 2021-yilning 17-mayidagi Plitindustrybuilding MCHJdan undiruvchi S.Gafurova foydasiga Mirzo Ulug‘bek tumani Qori Niyoziy ko‘chasi, 25-uyning 50 foizlik ulush qismi uchun jami bo‘lib 1.000.000.000 so‘m va B.Rasulov, D.Rasulova, A.Sultonxo‘jayev va N.Ziyoxo‘jayevlar foydasiga Mirzo Ulug‘bek tumani Qori Niyoziy ko‘chasi, 25-uyning 1/10 ulush qismi uchun har birlariga jami bo‘lib 200.000.000 so‘mdan kompensatsiya undirish belgilangan. Kompensatsiya pullari to‘liq undirilgandan so‘ng, undiruvchilarning egalik huquqi tugatilib, mazkur xonadondan ko‘chirib chiqarish to‘g‘risidagi ijro hujjati 2021-yilning 22-oktabrida bo‘lim ish yurituviga kelib tushgan.
Ijro harakatlari davomida Plitindustrybuilding MCHJ tomonidan kompensatsiya pullari bo‘lim depozit hisob raqamiga to‘liq undirilgan.
Ushbu ijro ishi bir necha bor to‘xtatilib, yana ijroga qaratilgan.
Jumladan, fuqarolik ishlari bo‘yicha Toshkent shahar sudining 2022-yilning 8-sentabridagi xatiga ko‘ra ijro harakatlari vaqtincha to‘xtatilgan va ushbu sudning 2022-yilning 25-mayidagi xatiga asosan esa ijroni to‘xtatish haqidagi ko‘rsatma bekor qilingan.
Izoh (0)