Buxorolik Dilafro‘z Xolmurodova 23 yoshida tuxmat bilan qamalib ketadi, u tergov jarayonlaridagi qiynoqlar tufayli qilmagan ishini bo‘yniga olishga majbur bo‘lgan. U bu haqda “Baxtlimiz” loyihasiga bergan intervyusida aytib o‘tdi.
Bo‘lajak erim qotillik qildi
Bir yigit bilan tanishib qoldim. U qashqadaryolik edi, sovchi jo‘natdi, turmushga chiqadigan bo‘lib turgan edim, uydagilar rozi bo‘lishdi. Keyin kimnidir gapiga kirib turmushga chiqayotgan yigitim bir ayolni o‘ldirib qo‘ydi.
O‘lgan ayolnning qaynonasiga men bilan unashtirilgan yigit to‘y qilishga sharoitim yo‘q deganda, to‘yingni qilib beraman, faqat kelinimni o‘ldirib bersang bo‘ldi, deb pul bergan.
Qaynonaning aytishicha, kelini uni urar ekan. O‘g‘lining ko‘zi ko‘r, oyoqlari ishlamaydi, yura olmaydi. O‘g‘li yaxshi topar ekan, o‘sha pulni qaynonasi olishni xohlar ekan, kelini bermas ekan.
Tergov jarayonida ayolning qaynonasi yigitga “Sen qamalib ketasan, bu ham (Dilafro‘z nazarda tutilmoqda — tahririyat) erga tegib ketadi. Agar uni ham qo‘shib yozib bersang, birga qamalasan, birga chiqib yana hayoting yaxshi bo‘lib ketadi degan. U bola meni odam o‘ldir deb iltimos qilgani uchun ham shu ishni qilgani haqida ko‘rsatma bergan. Qaynona ham, yigit ham bir xil mazmunda — meni ham qo‘shib yozib bergan. Ikki kishining gapi bir xil bo‘lgani uchun men ham ular bilan qamalib ketganman.
Men voqea joyida bo‘lmaganman, o‘lgan odamni ko‘rmaganman ham. Hukmda o‘qidim, ayol pichoq bilan o‘ldirilgan. Eshitishim bo‘yicha kampirni ko‘r o‘g‘li ham qotillikka aralashgan. O‘g‘li xotinini yelkasidan ushlab turgan, yigit pichoq urgan ekan. Kampir o‘g‘lining ham qamalib ketmasligi uchun qotillikni o‘zim uyushtirganman deb yozib bergan.
Men o‘zimning uyimda yotgan edim, ertalabki soat 03:00 lar edi. Yigit menga telefon qilib, “Odam o‘ldirib qo‘ydim. Men ketaman, lekin men kelguncha tinch yur, men hech qanday gap eshitmay” dedi. Uxlab yotgan edim, “xo‘p, xo‘p” deb e’tibor bermay telefonni qo‘ydim. Ertalab yana soat 06:00 larda telefon qilyapti, “Men Toshkentga qochib ketdim, odam o‘ldirib qo‘ydim, tinch yur kampir ishni bosdi-bosdi qilishi bilan qaytib kelaman, to‘y qilamiz, seni olib ketaman”, dedi. Yigit qamalganidan 3 kun o‘tib meni qamashdi.
Urib bo‘ynimga qo‘yishdi
Menga mana shu qog‘ozga qo‘l qo‘yasan deb urushdi, shu ishni qilgansan, deb qo‘l qo‘ydirishdi. Yetti oy tergov bo‘lgan bo‘lsa, shuncha vaqt davomida kaltak yeganman. Zarblardan tanam charchab ketgandi. Ko‘pchilikning o‘lib qolganini eshitganman, o‘lib qolmaslik, yashash uchun mayli deb qo‘l qo‘yganman. Qayerimga to‘g‘ri kelsa yog‘och bolg‘a bilan urushardi, tishlarim sinib ketgan. Ko‘p marta yiqilib qolganman. Urishganda hushimdan ketib qolardim, uyg‘onganimda hamma joyim qon bo‘lardi. Yotqizib qo‘yishardi, birinchi yordam ko‘rsatishardi.
Nima desam ham befoyda bo‘lgan, hattoki sudda meni gapirtirishmagan. Oxirida so‘z berishgan bo‘ldi. Oxirgi so‘zim, aybim yoq deb kampirga boshqa hech kim bilmasa ham siz yaxshi bilasiz, ayting deganimda, u gapirolmay chiqib ketgandi. Menga 17 yil, yigitga 21 yil, kampirga esa 19 yil berildi.
Rahmatli dadam, “Mayli, men ko‘chada yashayman, uyni ham sotaman, shuni olib qolsam bo‘ldi”, deb ko‘p harakat qilgan. Lekin natija bo‘lmagan. Ko‘pchilik dadamga meni qoralab, qizingiz unday qilgan, qizingiz bunday qilgan deganda, dadam “Qizimga ishonaman”, deganlar.
Qamoqdan uygacha...
Qamoqqa o‘rganish qiyin bo‘lgan, lekin odam u yerda boshqacha bo‘lib qolar ekan. O‘zingni hech kimga keraksiz odamday his qilasan. Oldin nima ish qilgansan, deb so‘rashgan. Shunga qarab ishga qo‘yadi, o‘rgatadi, Kuniga 8-10 soat ishlatadi.
2010-yil qamalgan bo‘lsam, oradan 5 yil o‘tib jigarimda Exinokokk borligini bilganman. Jigarimni yarmini olib tashlashdi, 6 oy yotdim. Menga yaxshi qarashdi, yana 6 oygacha yotoq rejimida yashadim. Oyoqqa turib, yurib ketganimdan keyin holatimga qarab ish buyurishdi.
Qamoqqa qaytganimdan so‘ng, 2 yilimni olib tashlashdi. Undan avval 3 yil-u 3 oyimni olishgan, keyin 2 yil-u 2 oyni va 1 yil-u 6 oy jazo muddatim olib tashlangan. Shu bilan muddat qisqarib, yarmini o‘tab, 2018-yilda ozodlikka chiqqanman.
Izoh (0)