Бухоролик Дилафрўз Холмуродова 23 ёшида тухмат билан қамалиб кетади, у тергов жараёнларидаги қийноқлар туфайли қилмаган ишини бўйнига олишга мажбур бўлган. У бу ҳақда «Бахтлимиз» лойиҳасига берган интервьюсида айтиб ўтди.
Бўлажак эрим қотиллик қилди
Бир йигит билан танишиб қолдим. У қашқадарёлик эди, совчи жўнатди, турмушга чиқадиган бўлиб турган эдим, уйдагилар рози бўлишди. Кейин кимнидир гапига кириб турмушга чиқаётган йигитим бир аёлни ўлдириб қўйди.
Ўлган аёлннинг қайнонасига мен билан унаштирилган йигит тўй қилишга шароитим йўқ деганда, тўйингни қилиб бераман, фақат келинимни ўлдириб берсанг бўлди, деб пул берган.
Қайнонанинг айтишича, келини уни урар экан. Ўғлининг кўзи кўр, оёқлари ишламайди, юра олмайди. Ўғли яхши топар экан, ўша пулни қайнонаси олишни хоҳлар экан, келини бермас экан.
Тергов жараёнида аёлнинг қайнонаси йигитга «Сен қамалиб кетасан, бу ҳам (Дилафрўз назарда тутилмоқда — таҳририят) эрга тегиб кетади. Агар уни ҳам қўшиб ёзиб берсанг, бирга қамаласан, бирга чиқиб яна ҳаётинг яхши бўлиб кетади деган. У бола мени одам ўлдир деб илтимос қилгани учун ҳам шу ишни қилгани ҳақида кўрсатма берган. Қайнона ҳам, йигит ҳам бир хил мазмунда — мени ҳам қўшиб ёзиб берган. Икки кишининг гапи бир хил бўлгани учун мен ҳам улар билан қамалиб кетганман.
Мен воқеа жойида бўлмаганман, ўлган одамни кўрмаганман ҳам. Ҳукмда ўқидим, аёл пичоқ билан ўлдирилган. Эшитишим бўйича кампирни кўр ўғли ҳам қотилликка аралашган. Ўғли хотинини елкасидан ушлаб турган, йигит пичоқ урган экан. Кампир ўғлининг ҳам қамалиб кетмаслиги учун қотилликни ўзим уюштирганман деб ёзиб берган.
Мен ўзимнинг уйимда ётган эдим, эрталабки соат 03:00 лар эди. Йигит менга телефон қилиб, «Одам ўлдириб қўйдим. Мен кетаман, лекин мен келгунча тинч юр, мен ҳеч қандай гап эшитмай» деди. Ухлаб ётган эдим, «хўп, хўп» деб эътибор бермай телефонни қўйдим. Эрталаб яна соат 06:00 ларда телефон қиляпти, «Мен Тошкентга қочиб кетдим, одам ўлдириб қўйдим, тинч юр кампир ишни босди-босди қилиши билан қайтиб келаман, тўй қиламиз, сени олиб кетаман», деди. Йигит қамалганидан 3 кун ўтиб мени қамашди.
Уриб бўйнимга қўйишди
Менга мана шу қоғозга қўл қўясан деб урушди, шу ишни қилгансан, деб қўл қўйдиришди. Етти ой тергов бўлган бўлса, шунча вақт давомида калтак еганман. Зарблардан танам чарчаб кетганди. Кўпчиликнинг ўлиб қолганини эшитганман, ўлиб қолмаслик, яшаш учун майли деб қўл қўйганман. Қаеримга тўғри келса ёғоч болға билан урушарди, тишларим синиб кетган. Кўп марта йиқилиб қолганман. Уришганда ҳушимдан кетиб қолардим, уйғонганимда ҳамма жойим қон бўларди. Ётқизиб қўйишарди, биринчи ёрдам кўрсатишарди.
Нима десам ҳам бефойда бўлган, ҳаттоки судда мени гапиртиришмаган. Охирида сўз беришган бўлди. Охирги сўзим, айбим ёқ деб кампирга бошқа ҳеч ким билмаса ҳам сиз яхши биласиз, айтинг деганимда, у гапиролмай чиқиб кетганди. Менга 17 йил, йигитга 21 йил, кампирга эса 19 йил берилди.
Раҳматли дадам, «Майли, мен кўчада яшайман, уйни ҳам сотаман, шуни олиб қолсам бўлди», деб кўп ҳаракат қилган. Лекин натижа бўлмаган. Кўпчилик дадамга мени қоралаб, қизингиз ундай қилган, қизингиз бундай қилган деганда, дадам «Қизимга ишонаман», деганлар.
Қамоқдан уйгача...
Қамоққа ўрганиш қийин бўлган, лекин одам у ерда бошқача бўлиб қолар экан. Ўзингни ҳеч кимга кераксиз одамдай ҳис қиласан. Олдин нима иш қилгансан, деб сўрашган. Шунга қараб ишга қўяди, ўргатади, Кунига 8-10 соат ишлатади.
2010 йил қамалган бўлсам, орадан 5 йил ўтиб жигаримда Эхинококк борлигини билганман. Жигаримни ярмини олиб ташлашди, 6 ой ётдим. Менга яхши қарашди, яна 6 ойгача ётоқ режимида яшадим. Оёққа туриб, юриб кетганимдан кейин ҳолатимга қараб иш буюришди.
Қамоққа қайтганимдан сўнг, 2 йилимни олиб ташлашди. Ундан аввал 3 йил-у 3 ойимни олишган, кейин 2 йил-у 2 ойни ва 1 йил-у 6 ой жазо муддатим олиб ташланган. Шу билан муддат қисқариб, ярмини ўтаб, 2018 йилда озодликка чиққанман.
Изоҳ (0)