Qoraqalpog‘istonda 15 nafar mansabdor lavozimidan ozod etilib, 116 nafariga intizomiy chora ko‘rildi

Qoraqalpog‘iston Jo‘qorg‘i Kengesi raisi tomonidan 15 nafar mansabdor shaxs egallab turgan lavozimidan ozod qilinib, 116 nafariga intizomiy jazo chorasi qo‘llanildi.

Ma’lum qilinishicha, davlat dasturlari asosida belgilangan vazifalarning bajarilishini ta’minlash hamda aholini qiynab kelayotgan muammolarni bartaraf etish chora-tadbirlari bo‘yicha bugungi kunga qadar Jo‘qorg‘i Kengesi raisi tomonidan 11 tumanda majlis o‘tkazildi.

O‘zAning yozishicha, mazkur majlislarni o‘tkazishdan maqsad, aholining farovon hayotini ta’minlash, bu borada o‘z vazifasiga sovuqqonlik bilan qaraydigan ayrim rahbarlarning mas’uliyatini oshirishdan iborat.

O‘tkazilgan majlislar bayonnomalari asosida davlat dasturlari doirasida belgilangan topshiriqlarni, o‘z sohalari bo‘yicha yuklatilgan vazifalarni bajarishda xato-kamchiliklarga yo‘l qo‘ygan, o‘ziga bildirilgan ishonchni oqlay olmagani uchun 15 nafar mansabdor shaxs Jo‘qorg‘i Kengesi raisi tomonidan egallab turgan lavozimidan ozod qilingan.

Shu bilan birga, 116 nafariga intizomiy jazo chorasi qo‘llanilgan.