Marvelning “Qora pantera: abadiy Vakanda” filmi butun dunyo bo‘ylab prokatning birinchi haftasidayoq 330 million dollar to‘plashga muvaffaq bo‘ldi. Daromadning 180 million dollari Shimoliy Amerikadan, 155 million dollari esa xalqaro hududlardan tushgan, deb yozadi “Film.ru”.
Shuningdek, mazkur kartina 2013-yildagi “Hayot mamot o‘yinlari-2”ni (158 million dollar) ortda qoldirib, 2022-yil noyabr oyidagi kassa rekordini o‘rnatdi. Film 2022-yilning eng ko‘p daromad keltirgan debyuti bo‘lib, faqatgina “Doktor Strenj: telbalik multidunyosida” kartinasidan (185 million dollar) keyingi o‘rinni egalladi.
Blokbaster sikveli qirol T’Challa (Chedvik Bouzmen) vafotidan keyingi Vakanda haqida hikoya qiladi. Qirollik tahdidlar ostida qoladi, buning natijasida T’Challaning singlisi Shuri (Letisha Rayt) Qora Pantera qiyofasiga kirib, kuchlar muvozanatini tiklashi kerak bo‘ladi. Filmga Rayan Kugler yana bir bor rejissorlik qildi. Filmda Anjela Bassett, Lupita Niongo, Tenoch Uerta, Martin Friman va boshqalar ishtirok etgan.
Birinchi “Pantera” 2018-yilda chiqqan va 404 million dollar daromad ishlab topgan. Bosh rolni ijro etgan Bouzmen 2020-yilning yozida saraton kasalligidan vafot etgan.
Izoh (0)