“Daryo” nashrining YouTube’dagi kanalida ijtimoiy tarmoqlarda mashhurlikka erishgan xonanda Osman Navro‘zov bilan suhbat tashkil qilindi. Xonanda Osman Navro‘zov pandemiya paytida Sardobadagi qurilishda 2 oy ishlagani, yiqilib tushib yig‘lagani, qurilishdagi ishidan qancha daromad topgani haqida gapirib berdi.
“O‘zimning topgan pulim yetmagan, keyin qurilishga bordim”
Ilojim yo‘q edi, hayot uchun kurashdim. Qarzim bor bo‘lgan, u payti “Do‘stim” qo‘shig‘im chiqmagan edi. To‘y xizmatlarim ham bor edi, lekin ko‘p pul sarflar edim. Nimanidir kiygim kelsa olganman, o‘sha paytlari otam Rossiyada ishlardi. Keyin bir ham o‘rtog‘im, ham qo‘shnim seni Toshkentda tanishlaring ko‘p, Sardobada katta qurilish ishlari ketyapti ekan, shuni gaplashib ber. Moskvaga ketishga imkoniyatim bo‘lmayapti, shu yerda ishlamoqchiman, dedi. Gaplashamiz dedim, shu bilan to‘y xizmatlari ham to‘xtadi, o‘sha paytda Xorazm va Qoraqalpog‘istonda ham konsert berishim kerak edi.
Kliplarimni efirga berganman, qo‘shiqlarimning pulini berishim kerak bo‘lgan, shuning uchun qarz olgandim. O‘zimning topgan pulim yetmagan, keyin qurilishga bordim. U yerdagi inson bilan aloqalarim yaxshi edi, do‘stimga shu qurilishdan bittasini berishini, karantin ko‘pchilikni qiynab qo‘yganini aytdim, rozi bo‘ldi. Ertasi kuni o‘rtog‘im Osman, men bilan yur, baribir karantin, to‘yga bormayapsan, dedi. O‘sha paytlar ko‘chaga chiqish ham muammo bo‘lgan, ruxsatnoma kerak edi, biroq hujjatni to‘g‘rilagan bilan Toshkentga kirish muammo bo‘lgan. O‘ylab ko‘rdim, ishlagan paytlarim esga tushdi, mayli, ishlayman, dedim.
Keyin ishni boshladik, katta konteynerga joylashdik. Do‘stimga men oddiy ishchiman, san’atkor emasman, dedim. Formani kiyaman, 20 ta bola bor, tinmasdan ishladim, ertalab 6 da turib, kechki 7 da uxlar edim. U paytlari YouTube’dan pul chiqib turar edi. Bolalarga pul kerak edi, YouTube’dan chiqqan 1,5 ming dollar pulimni ularga berdim, uyga bermadim. Keyin bir kuni, qo‘limda quti bor edi, uning ichida qo‘lqop, bolgarkaning toshlari bo‘lgan. Odam odamni tanimas darajada chang bo‘lib ketar edi, atrofga qarab kelayotgan edim, yerga sim ko‘milgan ekan bir oyog‘im kirib aylanib yiqilib tushdim. Yuz-qo‘llarim chang bo‘lib ketdi, yotgan joyimda yig‘ladim. Hech kimga qaramasdan yig‘lab yotdim, tepamda bolalar ishlayotgan edi.
“To‘yda qo‘shiq aytgan paytim siqilib qolaman, o‘tgan davrlarim esimga tushadi”
Yig‘laganimda bir quvondim, chunki harakat qilyapman, dedim. Keyin o‘rnimdan turib, yuzimni yuvganimdan keyin tanib qolganlar bu yerda senga nima bor, ijod qilmasdan YouTube’dan oyiga 2 000 dollar olyapsan, deyishdi. Keyin ishlayotganimni, halol mehnat qilib pul topayotganimni aytdim. U payt shoh ham, gado ham bir xil bo‘lib qolgan payt edi. Keyin ko‘pchilik to‘g‘ri tushundi, karantinda Qoraqalpog‘iston va O‘zbekistonda eng ko‘p pul topgan xonanda ekanimni aytishdi.
O‘sha paytlari ham otam Moskvada edi, eng kichkina singlimni o‘qishga kirgizish kerak bo‘lgan. Ish tugadi, haqqimizni oldik, u pulni singlimning o‘qishiga berdim. Singlimga bergan pulimni qaytarasan, men Sardobaga ketib seni o‘qishga kirgizdim, deb hazillashaman. Men bundan quvonaman, changda, armaturaning tagida yurib, ishlab san’atga kirganman. Har kuni avvalgi hayotim bilan hozirgisini solishtirib ko‘raman. Pul yetmaganda to‘xtamaganman, hozir nimaga to‘xtashim kerak, deyman. To‘yda qo‘shiq aytgan paytim siqilib qolaman, o‘tgan davrlarim esimga tushadi. O‘sha paytlari ham to‘ylarga chiqar edim. O‘rtog‘imga ishlagan pulimdan 5-10 million kam berishini so‘raganman. Ikki oy ishlagan bo‘lsam, 10 kunida to‘yga borganman. Hammasi bo‘lib 38 ta uy qurilgan, shundan oxirgisini olganmiz. Qurilishdan 30 million topganman, — deydi xonanda.
Mavzuga doir:
- Janob Rasul, Osman Navro‘zov va Jaloliddin Ahmadaliyev. Internet yulduzlarining “birrov”i qancha?
- Ukrain, rus, qozoq va eroniy — o‘zga millat vakili bo‘lsa-da, sof o‘zbek tilida ijod qilayotgan mashhurlar (foto)
- “Jo‘ji qoro”, “Akaxonlarim”, “Eh, jo‘ralar”. Hayotdagidan ko‘ra YouTube’da mashhur bo‘lgan o‘zbekistonlik san’atkorlar (video)
Izoh (0)