G20 саммити доирасидаги учрашувда АҚШ президенти Жо Байден туркиялик ҳамкасби Ражаб Тоййиб Эрдўғонга Истанбулдаги теракт муносабати билан ҳамдардлик билдирди. Бу ҳақда Оқ уй матбуот хизмати хабар берди.
«Президент Байден Истанбулдаги зўравонлик ҳаракати муносабати билан президент Эрдўғон ва Туркия халқига чуқур ҳамдардлик билдирди ҳамда НАТОдаги иттифоқдошимизни қўллаб-қувватлашимизни тасдиқлади», — дейилади баёнотда.
Маълумот учун, Истанбулнинг Беёғлу тумани, Истиқлол кўчасида 13 ноябрь куни кучли портлаш содир бўлганди. Бу кўча пиёдалар учун мўлжалланган бўлиб, сайёҳлар учун энг машҳур жойлардан бири саналади. У ерда Россия Бош консулхонаси ҳам жойлашган. Портлашдан кейин кўча бутунлай тўсиб қўйилган.
Истанбул Бош прокуратураси воқеани теракт сифатида баҳолади. Sabah газетасининг полицияга таяниб хабар беришича, портлашни 1999 йилда туғилган Сурия фуқароси Аҳлам Альбашир амалга оширган, агентлик маълумотларига кўра, у сўроқ пайтида Курдистон ишчилар партияси билан алоқадорлигини тан олган. Курдлар терактга алоқадорлик ҳақидаги айбловларни рад этиб чиқди.
Воқеа муносабати билан бир қатор давлатлар қаторида Ўзбекистон Туркияга ҳамдардлик билдирди. АҚШ ҳукумати томонидан ҳам расмий ҳамдардлик билдирилди. Бунга жавобан Туркия ички ишлар вазири Сулаймон Сойлу Анқара АҚШнинг ҳамдардликларини қабул қилмаслигини айтди.
«Биз Америка элчихонасидан билдирилган таъзияни қабул қилмаймиз. Биз ҳеч кимга сотқинлик қилмаяпмиз, лекин бизга қилинаётган сотқинликка ортиқ чидаб туролмаймиз», — деди у ва Туркия ҳукумати «ҳужум қаерда мувофиқлаштирилганидан хабардор эканини» ҳам таъкидлади.
Изоҳ (0)