Ko‘p tomonlama institutlar, shu jumladan, BMT ham sayyoradagi xaos (tartibsizlik, alg‘ov-dalg‘ovlik) eplay olmadi va muammolarni hal qila olmadi. Bu haqda “Katta yigirmatalik” sammitida Hindiston bosh vaziri Narendra Modi aytib o‘tdi. Uning gaplarini The Indian Express gazetasi keltirdi.
Modi dunyo bugungi kunda to‘qnash kelayotgan muammolar qatorida iqlim o‘zgarishi, koronavirus pandemiyasi, Ukrainadagi voqealar va yetkazib berishlar global zanjirining uzilishini tilga oldi. Uning so‘zlariga ko‘ra, BMT bu muammolarga yechim topa olmagan.
“Biz barchamiz tegishli islohotlarni o‘tkaza olmadik. Shu sababli bugungi kunda dunyoning G20 dan umidlari katta. Guruhimizning dolzarbligi yanada kattaroq ahamiyat kasb etdi”, — dedi Modi.
Modi Ukrainadagi nizoga alohida to‘xtalib o‘tdi. U diplomatiya yordamida o‘t ochishni to‘xtatish va ziddiyatga yechim topishga chaqirdi.
G20 sammiti Balida bugun, 15-noyabr kuni boshlanib, ertaga ham davom etadi. Financial Times yozishicha, sammit yakunida qabul qilinadigan qo‘shma bayonotda guruhning aksariyat mamlakatlari Rossiyaning Ukrainadagi xatti-harakatlarini qat’iyan qoralashi kutilmoqda. Delegatsiyalar a’zolari bayonot loyihasini allaqachon kelishib olgan, biroq ishtirokchi mamlakatlar yetakchilari uni imzolaganicha yo‘q.
Izoh (0)