«Дарё» нашри 15 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Зеленский Россия билан янги Минск келишувларини имзоламайди
Украинага янги ва самарали хавфсизлик кафолатлари керак, Минск келишувларига қайтиш бундан мустасно. Бу ҳақда Украина президенти Владимир Зеленский G20 саммитида видеомурожаатида айтиб ўтди.
«Биз Россиянинг кейинчалик террор ва глобал беқарорликнинг янги сериясини бошлаш учун ўз кучларини қайта тўплашига йўл қўймаймиз. Ҳеч қандай ‘Минск-3’ келишуви бўлмайди, чунки келишув имзоланиши билан Россия уни бузади», — деди Зеленский. Унинг сўзларига кўра, Россия ўз қўшинларини Украина ҳудудидан зудлик билан олиб чиқиб кетиши, дунё давлатлари эса Россия энергия ресурслари учун «нарх потологини» келишиб олиши керак.
Украина раҳбари Kyiv security compact (Киев Хавфсизлик шартномаси) деб номланган келишув доирасида урушдан кейинги хавфсизлик архитектурасини яратишга чақирди. Шу билан бирга, у келишувларнинг Минск форматига қайтишни истисно қилмоқда.
Маълумот учун Минск келишувлари Донбассдаги вазиятни тартибга солиш бўйича 2014—2015 йилларда Украина, Россия ва Европада хавфсизлик ва ҳамкорлик ташкилоти вакилларидан иборат уч томонлама алоқа гуруҳи томонидан тузилган. Уларни Россия, Украина, Франция президентлари, шунингдек, Германия канцлери қўллаб-қувватлаган.
Келишувларда Украина шарқидаги можаро томонларининг ўт очишни тўхтатиш, можаро зонаси ҳудудига оғир қуролларни жойлаштирмаслик ва асирларни «ҳаммасига ҳамма» форматида алмашиш мажбурияти мустаҳкамланган эди. Индонезиянинг Бали оролида 15 ноябрь куни G20 мамлакатлари етакчиларининг саммити бошланди. Индонезия президенти Жоко Видодо саммитдаги биринчи нутқида «урушни тугатиш»га чақирди.
Украина бўйича Хитой ва Франция давлат раҳбарлари қандай позиция билдирмоқда?
Хитой раҳбари Си Цзиньпин ва Франция президенти Эммануэль Макрон Украинада ўт очишни тўхтатиш ва тинчлик музокараларини қайта бошлашга чақирди. Улар бу ҳақда Индонезиянинг Бали оролида G20 саммити бошланиши олдидан бўлиб ўтган музокаралар чоғида айтди.
Си Цзиньпиннинг сўзларига кўра, Хитойнинг Украина инқирози бўйича позицияси аниқ ва изчил. У ўт очишни тўхтатиш, ҳарбий ҳаракатларни тўхтатиш ва тинчлик музокараларини қайта бошлаш тарафдори. «Халқаро ҳамжамият бунинг учун шароит яратиши керак, Пекин ўзининг конструктив ролини давом эттиради», — деб қўшимча қилди Хитой раҳбари.
Макрон, ўз навбатида, Си Цзиньпиндан Россия президенти Владимир Путинни Украина бўйича музокаралар столига қайтаришни сўради, деб ёзади Le Monde. Россиянинг Украинадаги босқини бошланганидан бери Хитой нейтрал позицияни эгаллаб келмоқда. Мамлакат Украинанинг ҳудудий яхлитлигини қўллаб-қувватлади, бироқ Россияга қарши санкциялар киритмади. Сентябрь ойида Хитой ташқи ишлар вазири томонлар ҳеч қандай шартларсиз музокараларни давом эттириши кераклигини айтган эди. Унинг фикрича, иккала томон ҳам можарога барҳам бериш шартларини муҳокама қилиши керак.
Макрон, ўз навбатида, ҳарбий ҳаракатлар бошланганидан бери Путинга бир неча бор қўнғироқ қилиб, уни ўт очишни тўхтатишга чақирди. AFP Елисей саройининг юқори мартабали вакилига таяниб, Франция президенти G20 дан кейин россиялик ҳамкасбига қўнғироқ қилмоқчи эканини хабар қилган.
Нарендра Моди: «БМТ дунёдаги алғов-далғовликни эплай олмади»
Кўп томонлама институтлар, шу жумладан, БМТ ҳам сайёрадаги хаос (тартибсизлик, алғов-далғовлик) эплай олмади ва муаммоларни ҳал қила олмади. Бу ҳақда «Катта йигирматалик» саммитида Ҳиндистон бош вазири Нарендра Моди айтиб ўтди. Унинг гапларини The Индиан Express газетаси келтирди.
Моди дунё бугунги кунда тўқнаш келаётган муаммолар қаторида иқлим ўзгариши, коронавирус пандемияси, Украинадаги воқеалар ва етказиб беришлар глобал занжирининг узилишини тилга олди. Унинг сўзларига кўра, БМТ бу муаммоларга ечим топа олмаган.
«Биз барчамиз тегишли ислоҳотларни ўтказа олмадик. Шу сабабли бугунги кунда дунёнинг G20 дан умидлари катта. Гуруҳимизнинг долзарблиги янада каттароқ аҳамият касб этди», — деди бош вазир. Нарендра Моди Украинадаги низога алоҳида тўхталиб ўтди. У дипломатия ёрдамида ўт очишни тўхтатиш ва зиддиятга ечим топишга чақирди.
Ўзбекистоннинг Қирғизистон билан чегара чизиғидан қанча хонадон кўчирилиши маълум қилинди
Бош вазир Абдулла Арипов парламент қуйи палатаси йиғилишида ўзбек-қирғиз давлат чегарасининг янги белгиланаётган ҳудудларидан Ўзбекистон чегара чизиғидан қанча хонадон кўчирилиши тўғрисида маълумот берди.
Абдулла Ариповнинг таъкидлашича, янги чегара чизиқларини белгилашда Ўзбекистон чегара чизиғидан 130 та хонадонни кўчириш назарда тутилмоқда.
Чегарани янги делимитация ва демаркация қилганимиздан кейин, унинг ҳимоя, эксплуатация қилиш ҳудудлари бор. Бу ҳудудларда чегара чизиғидан тахминан 50 метргача бўлган қисми очилади. Чунки бу ерда чегаранинг ҳимоя йўлаги ташкил этилиши керак. Ундан кейин иккита сим тўсиқлари жойлаштириш лозим. Албатта, бунинг ўз талаблари бор. Мазкур талаблар бажарилиши учун маълум жойлардан одамларни кўчиришга мажбур бўламиз.
Ҳозирги ҳисоб-китобларга кўра, бунинг учун тахминан 130 та хонадонни кўчириш назарда тутилмоқда. У ердаги аҳолининг ҳовлиси ва уй ичидаги барча нарсалар, ҳатто дарахтлар нархигача ҳисобланган. Бунга биздан тахминан 50 миллиард сўм компенсация маблағлари ажратилади.Агар улар хоҳласа, уйининг маблағини компенсация қилиб, тўлаб берамиз. Ўзлари қуриб олишлари учун бошқа ерлардан жой ажратамиз. Ёки уларга янги қурилган уйлар таклиф қиламиз. Агар улар шуни истаса, ўша уйлардан белгиланган таннархи қийматида компенсация ҳисобидан сотиб олиш имконини берамиз. Яъни бирор одам норози бўлмайди», — дея маълум қилди бош вазир.
Изоҳ (0)