“Simyog‘ochlar qulab tushib, tok urish xavfi bor, yo‘llar abgor”. Andijonning Buloqboshi tumanida yashovchi aholi muammolar girdobida yashamoqda

Andijon viloyatining Buloqboshi tumani “Uchtepa” mahallasida yashovchi aholi vakillari “Daryo”ga murojaat qilib, hududda “Obod qishloq” dasturi asosida qilinishi zarur bo‘lgan ishlar belgilangan muddatda qilinmaganligi bois, yog‘ingarchilik kunlarida ko‘chalarda yurib bo‘lmayotganini, o‘quvchilar maktabga borib-kelishda qiynalayotganini ma’lum qildi.

“Daryo” muxbiri aholi murojaatini o‘rganish maqsadida Buloqboshi tumanida bo‘ldi.

Mahalla aholisining aytishicha, mutasaddilar ko‘chaning asosiy qismi asfalt qilib berilishini, kichik ko‘chalarda yashovchilar esa shaxsiy mablag‘lari evaziga hashar usulida o‘zlari yo‘lni ta’mirlab olishlari kerakligini bildirgan. Bu bo‘yicha hokimlik va quruvchilarga murojaat qilingan bo‘lsa-da qoniqarli javob berilmagan.

Mahalla faoli Abdulhakim Sattorovning ta’kidlashicha, ushbu mahallaga aholi o‘tgan asrning 90-yillarida ko‘chib kelgan. Aholi mahallaning “Obod qishloq” dasturiga tushganini eshitib xursand bo‘lgan. Biroq yil oxirlagan sari dastur bajarilish bo‘yicha umid qolmagan.

Ushbu uchastkalar 1990-yillarda berilgan. Men o‘zim 1993-yilda ko‘chib kelganman. Shundan beri shu yerda yashayman. Bu yerga ko‘chib kelganimizdan beri o‘zimiz yo‘llar qilganmiz. Mahalla pul yig‘ib elektr energiyasini tortganmiz. Bu yil mahallamiz “Obod mahalla” dasturiga tushgan. Allohga shukr suv muammosi hal bo‘ldi. Lekin yo‘llarimiz hali o‘nglanganicha yo‘q, simyog‘ochlarimiz almashtirilmagan. Hali ham o‘sha qo‘lbola ustunlar. Yomg‘ir yog‘sa, ko‘chalardan yurib bo‘lmaydi.Mahallamiz “Obod mahalla” dasturiga kirganda aholi raisga borganmiz. Sizlardan hech qanday hujjat kerak emas, barchasini o‘zimiz qilyapmiz, hech qanday xijolat bo‘lmasdan faqat kutinglar, hammasi birin-ketib qilib beriladi deyishgandi. Lekin yil tugash arafasida bo‘lsa ham bizning ko‘chada hali hech narsa bo‘lgani yo‘q. Yakuniga yetmasdan qolib ketadi degan hadikdamiz”, — deydi Abdulhakim Safarov.

Yana bir faol Ismatilla Nurmatov esa mahalladagi muammolar sabab to‘y va o‘lim marosimlarini o‘tkazishda ham qiyinchiliklar bo‘layotganini bildirmoqda.

Noshukurlik qilayotganimiz yo‘q, lekin bu yerga ko‘chib chiqqanimizga ham o‘ttiz yildan oshdi-da. Yomg‘irli kunlarda mashinalarning yurishi ham juda qiyin. Hatto ba’zida to‘y yoki o‘lim marosimlarini o‘tkazishda ham qiyinchilik bo‘lyapti. Ayniqsa, kuz-qish mavsumida ko‘chalarning sholipoyadan farqi bo‘lmay qoladi. Ahvol juda yomon. Hozirda asosiy muammoyimiz shu asfalt. Biz-ku bir amallarmiz, ammo maktabga qatnaydigan bolalarimizga qiyin bo‘lyapti, — deydi Ismat Nurmatov.

Bu mahallaga ko‘chib chiqqanimizga o‘ttiz yildan oshdi. Ko‘chib chiqqanimizda yosh edik, shuncha yil yashab, nevarali, ayrimlarimiz chevarali ham bo‘ldik. Nolishmas, Xudoga shukr suv muammosi hal bo‘ldi. Yaqin orada albatta chiqib qoladi. Lekin, bizda bitta muammo yog‘och ustunlar, oldiga borsangiz to‘k uradi. Bolalar yoniga bormasin, deb qo‘rqamiz. Shamol bo‘lsa simyog‘och qaysi o‘quvchining boshiga tushdi ekan, deb xavotir olamiz.

Bundan tashqari, ko‘chib chiqqan yilimiz hammamiz yonimizdan ko‘chalarimizga tosh, shag‘allardan yo‘l qilganmiz. Yaqinda ko‘chaga suv tortilganidan keyin yo‘llarimiz battar bo‘lib ketdi. Yosh bolalar bog‘cha va maktabga borgani qiynalyapti. Yo‘l yomonligidan yiqilib tushishyapti. Nabiram necha marta sirpanib yiqildi, har safar ust-boshlarini yangilayapmiz. Shular sababli uyda ming xayolda o‘tiramiz, — deydi Mohidilxon Madrahimova.

Ko‘chalarni yaxshilash uchun nimaiki chiqim bo‘lsa, o‘zimiz qilganmiz. Mana shu shebenniyam birinchi yomg‘ir yoqqan kundan keyin o‘zimiz to‘kdik. Aynan o‘sha kuni mahalla raisini chaqirib, o‘zimiz qilyapmiz deb ko‘rsatdim. Dastur doirasida o‘ng va chap taraflarimizdagi ko‘chalar ham qilindi. Biroq hali bizga yetib kelmadi. Bu yoqda esa yog‘in-sochin kunlar. Bolalarimiz qishni kunida qiynaladi, hammasi bir ahvolda keladi. Na rais, na hokim yordamchisi holimizdan xabar olmaydi.Vaholanki, ko‘p narsalarni azaldan o‘zimiz qilyapmiz. Misol uchun mana simyog‘ochlarni bundan uch yil oldin o‘zimiz olib o‘rnatganmiz. Sheben ham to‘ktirganmiz. Biroq yaqinda suv tortish uchun deb kovlashgandi yana oldingidek yurib bo‘lmaydigan bo‘lib qoldi. Shu ko‘chada yashovchi 12 ta xonadon bir amallab pul yig‘dik va sheben to‘ktirdik. Ammo qolganlarning mablag‘i yo‘qligi uchun qilolmayapti. Qish-qirovli kunlar kelmasdan yakuniga yetib berishsa yaxshi bo‘lardi, — deydi Fayzullo Jo‘rayev.

Buloqboshi tumani hokimligining qurilish ishlari bo‘yicha bosh mutaxassisi Temurmalik Qodirovning ma’lum qilishicha, “Obod qishloq” dasturi bo‘yicha “Uchtepa” mahallasining 9542 metr ko‘chalarini asfaltlash, betonlash hamda shag‘allash rejalashtirilgan. Shundan 800 metr asfalt “Mustaqillik” ko‘chasiga yotqizilishi belgilangan. Ko‘chaning qolgan qismlari esa hashar yo‘li bilan shag‘allashtirilish ko‘zda tutilgan.

“Obod qishloq” dasturi bo‘yicha 2022-yilda tumanda “Uchtepa” va “Tinchlik” mahalla fuqarolari yig‘inlari rejaga kiritilgan. Bu bo‘yicha ishlarni olib boryapmiz, yo‘l qurilishi, suv tarmog‘i, elektr energiya tortish bo‘yicha ishlar amalga oshirilyapti. Dasturga ko‘ra “Uchtepa” mahallasining 9542 metr yo‘lini ta’mirlash rejalashtirilgan. Shundan 1950 metrida beton yo‘l qurish, 6592 metrida esa asfalt yo‘l qurish va bir kilometr joyni shag‘allash rejalashtirilgan. Hozirda betonlash va shag‘allash ishlari to‘la yakunlangan. Shu kunga qadar ikki kilometrdan oshiq yerni asfaltlash ishlarini yakunladik. Yetti yarim kilometrga suv tarmog‘ini tortish ishlari yaqinda yakunlandi. Hozirda “Yoshlik” ko‘chasida asfalt ishlari olib borilyapti.

Mustaqillik ko‘chasida 800 metr asfalt qilishni rejalashtirganmiz. Suv tarmog‘ini tortishda kechikish bo‘lganligi sababli asfalt qurish ishlari hali bu ko‘chada boshlangani yo‘q. Belgilangan pul rejalashtirilgan loyihalar bo‘yicha ishlarni amalga oshiryapmiz. Ko‘chaning bitmay qolgan qismlarni, ya’ni loy ko‘chalarni mahalliy hokimiyat, ya’ni o‘zimiz hashar yo‘li bilan shag‘allab, mahalla sharoitini to‘g‘rilab berishni rejalashtirganmiz”, — deydi Temurmalik Qodirov.

“Daryo” muxbiri bilan suhbatlashgan mahalla raisi Hakimbek Xolmatov dastur bo‘yicha bosqichma-bosqich ishlar qilinayotganligini, haqiqatan ham Mustaqillik ko‘chasida suv tarmog‘i kech tortilganligi sababli yog‘ingarchilikda ko‘cha loy bo‘lganligini bildirgan. Shuningdek, ko‘chaning rejaga kiritilmagan qismlariga o‘z hisobidan shag‘al va sheben to‘ktirib, aholi norozi bo‘lmaydigan qilib ish tashkil qilishga va’da bergan.

Maqola tayyorlanishidan oldin “Daryo” muxbiri mahalla raisining va’dasi bajarilgan yoki bajarilmagani bilish hamda holatga aniqlik kiritish maqsadida murojaatchilar bilan yana suhbatlashdi. Ma’lum bo‘lishicha, haqiqatan ham ko‘chaga sheben va shag‘al to‘kilib, greyder yordamida tekislangan. Asfalt masalasi esa tez orada yechim topishi va’da qilinganini bildirgan.

“Daryo” voqealar rivojini kuzatishda davom etadi.