Андижон вилоятининг Булоқбоши тумани «Учтепа» маҳалласида яшовчи аҳоли вакиллари «Дарё»га мурожаат қилиб, ҳудудда «Обод қишлоқ» дастури асосида қилиниши зарур бўлган ишлар белгиланган муддатда қилинмаганлиги боис, ёғингарчилик кунларида кўчаларда юриб бўлмаётганини, ўқувчилар мактабга бориб-келишда қийналаётганини маълум қилди.
«Дарё» мухбири аҳоли мурожаатини ўрганиш мақсадида Булоқбоши туманида бўлди.
Маҳалла аҳолисининг айтишича, мутасаддилар кўчанинг асосий қисми асфальт қилиб берилишини, кичик кўчаларда яшовчилар эса шахсий маблағлари эвазига ҳашар усулида ўзлари йўлни таъмирлаб олишлари кераклигини билдирган. Бу бўйича ҳокимлик ва қурувчиларга мурожаат қилинган бўлса-да қониқарли жавоб берилмаган.
Маҳалла фаоли Абдулҳаким Сатторовнинг таъкидлашича, ушбу маҳаллага аҳоли ўтган асрнинг 90 йилларида кўчиб келган. Аҳоли маҳалланинг «Обод қишлоқ» дастурига тушганини эшитиб хурсанд бўлган. Бироқ йил охирлаган сари дастур бажарилиш бўйича умид қолмаган.
Ушбу участкалар 1990 йилларда берилган. Мен ўзим 1993 йилда кўчиб келганман. Шундан бери шу ерда яшайман. Бу ерга кўчиб келганимиздан бери ўзимиз йўллар қилганмиз. Маҳалла пул йиғиб электр энергиясини тортганмиз. Бу йил маҳалламиз «Обод маҳалла» дастурига тушган. Аллоҳга шукр сув муаммоси ҳал бўлди. Лекин йўлларимиз ҳали ўнгланганича йўқ, симёғочларимиз алмаштирилмаган. Ҳали ҳам ўша қўлбола устунлар. Ёмғир ёғса, кўчалардан юриб бўлмайди.Маҳалламиз «Обод маҳалла» дастурига кирганда аҳоли раисга борганмиз. Сизлардан ҳеч қандай ҳужжат керак эмас, барчасини ўзимиз қиляпмиз, ҳеч қандай хижолат бўлмасдан фақат кутинглар, ҳаммаси бирин-кетиб қилиб берилади дейишганди. Лекин йил тугаш арафасида бўлса ҳам бизнинг кўчада ҳали ҳеч нарса бўлгани йўқ. Якунига етмасдан қолиб кетади деган ҳадикдамиз», — дейди Абдулҳаким Сафаров.
Яна бир фаол Исматилла Нурматов эса маҳалладаги муаммолар сабаб тўй ва ўлим маросимларини ўтказишда ҳам қийинчиликлар бўлаётганини билдирмоқда.
Ношукурлик қилаётганимиз йўқ, лекин бу ерга кўчиб чиққанимизга ҳам ўттиз йилдан ошди-да. Ёмғирли кунларда машиналарнинг юриши ҳам жуда қийин. Ҳатто баъзида тўй ёки ўлим маросимларини ўтказишда ҳам қийинчилик бўляпти. Айниқса, куз-қиш мавсумида кўчаларнинг шолипоядан фарқи бўлмай қолади. Аҳвол жуда ёмон. Ҳозирда асосий муаммойимиз шу асфальт. Биз-ку бир амаллармиз, аммо мактабга қатнайдиган болаларимизга қийин бўляпти, — дейди Исмат Нурматов.Моҳидилхон Мадраҳимованинг айтишича, кўчага ўрнатилган симёғочлар нобоплиги ва темирдан бўлганлиги сабабли тўк уриш ва шамолда қулаб тушиш хавфи бор. Бу эса қиш-қировли кунларда ота-оналарнинг хавотири ошишига сабаб бўлмоқда.
Бу маҳаллага кўчиб чиққанимизга ўттиз йилдан ошди. Кўчиб чиққанимизда ёш эдик, шунча йил яшаб, неварали, айримларимиз чеварали ҳам бўлдик. Нолишмас, Худога шукр сув муаммоси ҳал бўлди. Яқин орада албатта чиқиб қолади. Лекин, бизда битта муаммо ёғоч устунлар, олдига борсангиз тўк уради. Болалар ёнига бормасин, деб қўрқамиз. Шамол бўлса симёғоч қайси ўқувчининг бошига тушди экан, деб хавотир оламиз.Маҳалла фаолларидан яна бири Файзулло Жўраевнинг айтишича, маблағи етган хонадон эгалари уйи атрофларига шебен тўктириб ёйган. Бироқ қолганларнинг имконияти етмаганлиги сабабли очиқ жойлар қолиб кетган. Натижада ёғин-сочин кунларда аҳолига қийинчилик туғдирмоқда.Бундан ташқари, кўчиб чиққан йилимиз ҳаммамиз ёнимиздан кўчаларимизга тош, шағаллардан йўл қилганмиз. Яқинда кўчага сув тортилганидан кейин йўлларимиз баттар бўлиб кетди. Ёш болалар боғча ва мактабга боргани қийналяпти. Йўл ёмонлигидан йиқилиб тушишяпти. Набирам неча марта сирпаниб йиқилди, ҳар сафар уст-бошларини янгилаяпмиз. Шулар сабабли уйда минг хаёлда ўтирамиз, — дейди Моҳидилхон Мадраҳимова.
Кўчаларни яхшилаш учун нимаики чиқим бўлса, ўзимиз қилганмиз. Мана шу шебенниям биринчи ёмғир ёққан кундан кейин ўзимиз тўкдик. Айнан ўша куни маҳалла раисини чақириб, ўзимиз қиляпмиз деб кўрсатдим. Дастур доирасида ўнг ва чап тарафларимиздаги кўчалар ҳам қилинди. Бироқ ҳали бизга етиб келмади. Бу ёқда эса ёғин-сочин кунлар. Болаларимиз қишни кунида қийналади, ҳаммаси бир аҳволда келади. На раис, на ҳоким ёрдамчиси ҳолимиздан хабар олмайди.Ваҳоланки, кўп нарсаларни азалдан ўзимиз қиляпмиз. Мисол учун мана симёғочларни бундан уч йил олдин ўзимиз олиб ўрнатганмиз. Шебен ҳам тўктирганмиз. Бироқ яқинда сув тортиш учун деб ковлашганди яна олдингидек юриб бўлмайдиган бўлиб қолди. Шу кўчада яшовчи 12 та хонадон бир амаллаб пул йиғдик ва шебен тўктирдик. Аммо қолганларнинг маблағи йўқлиги учун қилолмаяпти. Қиш-қировли кунлар келмасдан якунига етиб беришса яхши бўларди, — дейди Файзулло Жўраев.
Булоқбоши тумани ҳокимлигининг қурилиш ишлари бўйича бош мутахассиси Темурмалик Қодировнинг маълум қилишича, «Обод қишлоқ» дастури бўйича «Учтепа» маҳалласининг 9542 метр кўчаларини асфальтлаш, бетонлаш ҳамда шағаллаш режалаштирилган. Шундан 800 метр асфальт «Мустақиллик» кўчасига ётқизилиши белгиланган. Кўчанинг қолган қисмлари эса ҳашар йўли билан шағаллаштирилиш кўзда тутилган.
«Обод қишлоқ» дастури бўйича 2022 йилда туманда «Учтепа» ва «Тинчлик» маҳалла фуқаролари йиғинлари режага киритилган. Бу бўйича ишларни олиб боряпмиз, йўл қурилиши, сув тармоғи, электр энергия тортиш бўйича ишлар амалга ошириляпти. Дастурга кўра «Учтепа» маҳалласининг 9542 метр йўлини таъмирлаш режалаштирилган. Шундан 1950 метрида бетон йўл қуриш, 6592 метрида эса асфальт йўл қуриш ва бир километр жойни шағаллаш режалаштирилган. Ҳозирда бетонлаш ва шағаллаш ишлари тўла якунланган. Шу кунга қадар икки километрдан ошиқ ерни асфальтлаш ишларини якунладик. Етти ярим километрга сув тармоғини тортиш ишлари яқинда якунланди. Ҳозирда «Ёшлик» кўчасида асфальт ишлари олиб бориляпти.Мустақиллик кўчасида 800 метр асфальт қилишни режалаштирганмиз. Сув тармоғини тортишда кечикиш бўлганлиги сабабли асфальт қуриш ишлари ҳали бу кўчада бошлангани йўқ. Белгиланган пул режалаштирилган лойиҳалар бўйича ишларни амалга оширяпмиз. Кўчанинг битмай қолган қисмларни, яъни лой кўчаларни маҳаллий ҳокимият, яъни ўзимиз ҳашар йўли билан шағаллаб, маҳалла шароитини тўғрилаб беришни режалаштирганмиз», — дейди Темурмалик Қодиров.
«Дарё» мухбири билан суҳбатлашган маҳалла раиси Ҳакимбек Холматов дастур бўйича босқичма-босқич ишлар қилинаётганлигини, ҳақиқатан ҳам Мустақиллик кўчасида сув тармоғи кеч тортилганлиги сабабли ёғингарчиликда кўча лой бўлганлигини билдирган. Шунингдек, кўчанинг режага киритилмаган қисмларига ўз ҳисобидан шағал ва шебен тўктириб, аҳоли норози бўлмайдиган қилиб иш ташкил қилишга ваъда берган.
Мақола тайёрланишидан олдин «Дарё» мухбири маҳалла раисининг ваъдаси бажарилган ёки бажарилмагани билиш ҳамда ҳолатга аниқлик киритиш мақсадида мурожаатчилар билан яна суҳбатлашди. Маълум бўлишича, ҳақиқатан ҳам кўчага шебен ва шағал тўкилиб, грейдер ёрдамида текисланган. Асфальт масаласи эса тез орада ечим топиши ваъда қилинганини билдирган.
«Дарё» воқеалар ривожини кузатишда давом этади.
Изоҳ (0)