Испания пойтахти Мадридда тиббий хизмат сифатининг пасайишига олиб келган чораларга қарши 200 мингга яқин одам намойишга чиқди. Бу ҳақда Deutsche Welle хабар бермоқда.
Тиббиёт ходимлари касаба уюшмаси маълумотларига кўра, ўн йил олдин мамлакатдаги молиявий инқироз пайтида киритилган тежамкорлик чоралари сабаб Мадрид ҳудудидаги бирламчи тиббий ёрдам хизматлари ресурс ва ходимлар етишмаслигидан сўнгги йилларда катта босим остида бўлган.
Уюшма расмийларининг таъкидлашича, соғлиқни сақлаш сифати ёмон бошқарув туфайли пасайган, ҳудудий ҳукумат давлат ва хусусий соғлиқни сақлаш секторлари ўртасида кенгроқ шериклик ўрнатишга имкон берадиган тизимни қайта қуриши керак.
Расмийлар, шунингдек, соғлиқни сақлаш марказларида ходимларнинг етишмаслиги туфайли онлайн шошилинч ёрдам ҳажмини оширишни истайди.
Намойишчилар соғлиқни сақлаш соҳасига сармоя киритишдан ташқари, Мадрид ҳудудий ҳукуматининг ўнг қанот раҳбари Изабел Диас Аюсонинг истеъфосини ҳам талаб қилди.
Мамлакатнинг чап қанот ҳукумати норозиликни қўллаб-қувватлаб, Аюсо бошчилигидаги ҳудудий ҳокимият Мадриддаги соғлиқни сақлаш устидан «фалокатли бошқаруви» учун жавобгар эканини айтди.
«Мадрид ҳар бир аҳолига соғлиқни сақлаш соҳасида энг кам сармоя киритадиган ҳудуд. Мамлакатда бу сумма ўртача ҳар бир киши учун 1700 евро (1759 доллар)ни ташкил қилса, Мадридда 1300 евро», — деди вазир Феликс Боланос.
«Улар қилаётган иш мисли кўрилмаган фалокат. Мутахассисларни ушлаб туришнинг жуда оддий усули бор, яъни уларга яхши муносабатда бўлиш: уларга нафақат ойлик, балки ҳафталик дам олиш кунлари учун шартномалар бериш. Ҳукумат бунга қодир бўлмаса, демак бу ерда сиёсий манфаатлар бор», — деди чап қанот Мас Мадрид партиясидан сиёсатчи Моника Гарсия.
Изоҳ (0)