Россия президенти Владимир Путиннинг йиллик катта матбуот анжумани 2022 йилда бўлиб ўтмаслиги мумкин, ҳозирча уни йил охиригача ўтказиш тўғрисида якуний қарорга келинмаган, деб ёзади Meduza.
Владимир Путин 2001 йилдан катта матбуот анжуманлари ўтказишни йўлга қўйган, 2012 йилда уларни ўтказиш учун декабрь ойи танланган. Агар тадбир шу йилнинг декабрь ойида бўлиб ўтмаса, Путин 2005 йилдан кейин иккинчи марта бу йил матбуот анжумани ўтказмайди. Шунингдек, Путин бош вазир бўлган 2009—2011 йилларда ҳам матбуот анжуманлари бўлмаган.
Манбанинг таъкидлашича, бу йил президент ва россияликлар ўртасида «юзма-юз анжуман» ўтказиш тўғрисида ҳам якуний қарор йўқ. Нашр манбаларининг айтишича, ҳозирча тадбирга тайёргарлик кўрилмаяпти. Суҳбатдошлардан бири якуний қарор қабул қилишда «бошқа нарсалар қатори махсус ҳарбий операция зонасидаги вазият ҳам ҳисобга олинишини» таъкидлади.
«Юзма-юз анжуман» саналари тез-тез ўзгариб турди, охирги марта у 2021 йил 30 июнда ўтказилган. Уруш бошланганидан кейин Россия президентининг матбуот котиби Дмитрий Песков бир неча бор «юзма-юз анжуман» режалаштирилганини айтган эди, аммо аниқ саналар номаълумлигича қолган. Август ойида у 2020 йилдаги пандемия пайтида бўлгани каби, буни катта матбуот анжумани билан бирлаштириш мумкинини айтди.
«РБК»нинг таъкидлашича, президентнинг Федерал Мажлисга мурожаати қачон бўлиб ўтиши аниқ эмас, бунга тайёргарлик, Песков аввалроқ айтганидек, аллақачон бошланган.
Дмитрий Песков 14 ноябрь куни журналистлар билан суҳбатда катта матбуот анжумани санаси президентнинг Федерал мажлисга қачон мурожаат етказишига боғлиқ бўлишини айтди, деб ёзади «Интерфакс».
«Президент бир қатор тадбирларни ўтказишнинг аниқ саналари ҳақида қарор қилгани йўқ. Табиийки, уларни кетма-кет амалга ошириш мантиққа тўғри келмайди», — дейди Песков.
Изоҳ (0)