O‘zbekistonning Jidda shahridagi Bosh konsulxonasi tomonidan Saudiya Arabistoni Podshohligi Haj va umra vazirining xalqaro hamkorlik bo‘yicha o‘rinbosari Hasan Allamnaxra bilan uchrashuv tashkil etildi, deb xabar qilmoqda “Dunyo” axborot agentligi.
Qayd etilishicha, unda ikki tomonlama hamkorlikka oid qator muhim masalalar muloqotlarning asosiy mavzusi bo‘lgan. Suhbat avvalida H.Allamnaxra joriy yil 27—30-sentyabr kunlari Saudiya Arabistonining Haj va umra masalalari bo‘yicha vaziri Tavfiq ar-Rabi’a boshchiligidagi delegatsiyaning O‘zbekistonga tashrifi muvaffaqiyatli va samarali kechganini ta’kidlagan. Saudiya delegatsiyasining O‘zbekiston prezidenti tomonidan qabul qilingani, Toshkentda o‘tkazilgan ikki tomonlama samarali uchrashuvlar va o‘zbekona mehmondo‘stlik uchun minnatdorlik bildirgan.
Saudiya tomoni Makka yoki Jidda shahrida “Imom Buxoriy yurti avlodlari” mavzusidagi xalqaro konferensiya va ko‘rgazmani tashkil etish atroflicha o‘rganib chiqilayotgani va bunda Saudiya vazirlik, idoralar hamda Butunjahon musulmonlar uyushmasi faol ishtirok etayotganini ma’lum qilgan.
O‘zbekiston tomonidan Umra mavsumida O‘zbekistondan Saudiya Arabistoniga kelayotgan ziyoratchilarning soni ortib borayotgani va ularga Podshohlik hukumati yaratayotgan sharoitlar yuqori baholangan.
Shu o‘rinda O‘zbekistonda sayyohlik industriyaning rivojlanib borayotgani ta’kidlanib, Saudiya Arabistonidan ham Toshkentga kelayotgan sayyohlarning sonini oshirishga e’tibor qaratish muhimligi alohida qayd etilgan.
Suhbat chog‘ida Hasan Allamnaxra “agar saudiyaliklar O‘zbekistonning sayyohlik salohiyatini yanada yaqindan bilganlarida, ular Yevropa davlatlarini emas, balki Imom Buxoriy vatanini ziyorat qilar edilar”, — degan.
Muloqot chog‘ida mamlakat sayyohlik salohiyatini Saudiyada keng targ‘ib etish, O‘zbekiston turkompaniyalari tomonidan oilaviy turistik paketlarning ishlab chiqilishidagi afzalliklar, Jidda shahrida Haj va umra masalalariga bag‘ishlangan xalqaro konferensiya tashkil etilishi hamda uning ishida O‘zbekiston vakillari ishtiroki bilan bog‘liq va kun tartibidagi boshqa dolzarb masalalar atroflicha muhokama etilgan.
Izoh (0)