Ўзбекистоннинг Жидда шаҳридаги Бош консулхонаси томонидан Саудия Арабистони Подшоҳлиги Ҳаж ва умра вазирининг халқаро ҳамкорлик бўйича ўринбосари Ҳасан Алламнахра билан учрашув ташкил этилди, деб хабар қилмоқда «Дунё» ахборот агентлиги.
Қайд этилишича, унда икки томонлама ҳамкорликка оид қатор муҳим масалалар мулоқотларнинг асосий мавзуси бўлган. Суҳбат аввалида Ҳ.Алламнахра жорий йил 27—30-сентябр кунлари Саудия Арабистонининг Ҳаж ва умра масалалари бўйича вазири Тавфиқ ар-Рабиъа бошчилигидаги делегациянинг Ўзбекистонга ташрифи муваффақиятли ва самарали кечганини таъкидлаган. Саудия делегациясининг Ўзбекистон президенти томонидан қабул қилингани, Тошкентда ўтказилган икки томонлама самарали учрашувлар ва ўзбекона меҳмондўстлик учун миннатдорлик билдирган.
Саудия томони Макка ёки Жидда шаҳрида «Имом Бухорий юрти авлодлари» мавзусидаги халқаро конференция ва кўргазмани ташкил этиш атрофлича ўрганиб чиқилаётгани ва бунда Саудия вазирлик, идоралар ҳамда Бутунжаҳон мусулмонлар уюшмаси фаол иштирок этаётганини маълум қилган.
Ўзбекистон томонидан Умра мавсумида Ўзбекистондан Саудия Арабистонига келаётган зиёратчиларнинг сони ортиб бораётгани ва уларга Подшоҳлик ҳукумати яратаётган шароитлар юқори баҳоланган.
Шу ўринда Ўзбекистонда сайёҳлик индустриянинг ривожланиб бораётгани таъкидланиб, Саудия Арабистонидан ҳам Тошкентга келаётган сайёҳларнинг сонини оширишга эътибор қаратиш муҳимлиги алоҳида қайд этилган.
Суҳбат чоғида Ҳасан Алламнахра «агар саудияликлар Ўзбекистоннинг сайёҳлик салоҳиятини янада яқиндан билганларида, улар Европа давлатларини эмас, балки Имом Бухорий ватанини зиёрат қилар эдилар», — деган.
Мулоқот чоғида мамлакат сайёҳлик салоҳиятини Саудияда кенг тарғиб этиш, Ўзбекистон туркомпаниялари томонидан оилавий туристик пакетларнинг ишлаб чиқилишидаги афзалликлар, Жидда шаҳрида Ҳаж ва умра масалаларига бағишланган халқаро конференция ташкил этилиши ҳамда унинг ишида Ўзбекистон вакиллари иштироки билан боғлиқ ва кун тартибидаги бошқа долзарб масалалар атрофлича муҳокама этилган.
Изоҳ (0)