10-noyabr kuni Samarqand shahrida xorijliklar uchun birinchi boj olinmaydigan savdo do‘koni (Duty Free) ochildi. Bu haqda Davlatbojxona qo‘mitasi xabar berdi.
Samarqanddagi “Aleksandr” mehmonxonasida O‘zbekistonga tashrif buyurgan xorijliklar uchun mamlakat ichkarisida faoliyat yurituvchi birinchi boj olinmaydigan savdo do‘konining ochilish marosimi bo‘lib o‘tmoqda. Ushbu turdagi do‘konlar ishini tashkil etishda Janubiy Koreya tajribasi asos bo‘ldi, — deyiladi qo‘mita xabarida.
Qayd etilishicha, ushbu do‘kondagi tovarlar chakana savdoda o‘zbek so‘mida yoki boshqa davlatlar valyutasida sotiladi.
Do‘kondagi xorij tovarlari xaridorning shaxsini tasdiqlovchi hujjat, shuningdek, jo‘nab ketish uchun aviachipta ko‘rsatilgandan so‘ng tanlab olinadi va tanlangan tovarlar xalqaro aeroportlarda jismoniy shaxs jo‘nab ketgan kuni taqdim etiladi.
Bunday turdagi do‘konlar sayyohlar uchun qulaylik yaratadi, — deyiladi Davlat bojxona qo‘mitasi xabarida.
Ayni paytda Buxoro, Xorazm va Farg‘ona viloyatlarida ham bojsiz savdo do‘konlarini ochish bo‘yicha ishlar olib borilmoqda.
Avvalroq Uzbekistan Airports O‘zbekistondagi Duty Free tarmog‘idagi ulushini sotib olgani haqida xabar berilgandi.
Izoh (0)