Qashqadaryo viloyatining Koson tumanida maktab o‘quvchisi jismoniy tarbiya o‘qituvchisi tomonidan ayovsiz kaltaklandi. Mazkur murojaaat yuzasidan “Daryo” muxbiri surishtiruv olib bordi.
Ma’lum bo‘lishicha, o‘qituvchi o‘quvchini nasos bilan kaltaklagan.
2022-yilning 21—22-oktabr kunlari tobim yo‘qligi sabab maktabga borolmadim. Sog‘ayganimdan so‘ng, 24-oktabr, dushanba kuni maktabga bordim. O‘sha kuni ikkinchi soatda jismoniy tarbiya darsi edi. Sport formada zalga kirdik va bolalar bilan voleybol o‘ynadik. Tanaffusga 10 daqiqalar qolganda kiyim almashtirish uchun xonamizga ketdik. Qaytib kelganimizda esa jismoniy tarbiya o‘qituvchimiz Mirjahon Eshmurodov nega tanaffus bo‘lmasdan ketib qoldilaring deya shkaf tagidagi nasosni olib, hammamizni kaltaklay boshladi, — deydi o‘qituvchisidan shikoyat qilgan o‘quvchi Bunyod Qurbonov.O‘quvchining aytishicha, o‘qituvchi nasos bilan uning boshiga urgan.
Mendan avval bir kishini kaltakladi. So‘ng mening boshimga urgani uchun boshim yorildi va qon kela boshladi. Maktab hamshirasi boshimdan oqayotgan qonni to‘xtatish maqsadida spirt surtdi. Ammo qon to‘xtamadi. Shunday bo‘lsa-da, uyga qaytdim, — deydi u.Jabrlanuvchining akasi Ilyos Qurbonov ukasining ahvolidan xabar topgach, uni tibbiy ekspertizadan o‘tkazganini aytmoqda.
Koson tumanidagi ekspertizaga borib, tibbiy ko‘rikdan o‘tkazdim. Boshini rentgen qildik. Keyin shifokorlarga ko‘rindik. Ular tomografiya qildirishimiz kerakligini aytdi. Shundan so‘ng shifokorlar dori yozib berdi. Xulosani esa IIB xodimlariga aytganmiz deyishdi, — deydi jarblanuvchining akasi Ilyos Qurbonov.Ma’lum qilinishicha, voqea “Daryo”ga murojaat qilinganidan so‘ng surishtirila boshlangan.
Biz ukamni shifokorlarga ko‘rsatib kelganimizdan so‘ng IIB xodimlari o‘rganadi, tegishli chora ko‘radi deb o‘tirgandik. Ammo o‘rtadan shuncha kun o‘tsa ham hech kim so‘rab kelmadi. Shundan so‘ng “Daryo” tahririyatiga murojaat qildik. Shu murojaatimizdan so‘ng voqea haqida surishtira boshlashdi, — deydi Bunyodning akasi.
Murojaatchilarning qo‘shimcha qilishicha, maktabning jismoniy tarbiya o‘qituvchisi o‘quvchilarini muntazam ravishda kaltaklab keladi.
“Daryo” muxbiri murojaatchilarning mazkur e’tirozidan so‘ng Koson tumanidagi 17-maktab direktori Aziza Ashirovadan o‘qituvchining harakatlariga izoh so‘ragan. Biroq direktor jurnalist bilan suhbatlashishdan bosh tortib, izoh bermagan. Qolaversa, maktabning jismoniy tarbiya o‘qituvchisi Mirjahon Eshmurodov ham harakatini izohlamagan. O‘qituvchining otasi va opasi Mirjahon Eshmurodov jurnalistlar bilan suhbatlashishga majbur emasligini bildirgan.
Aniqlanishicha, holat yuzasidan Koson tuman IIB tomonidan surishtiruv ishlari olib borilib, Mirjahon Eshmurodovga Ma’muriy javobgarlik to‘g‘risidagi kodeksning 52-moddasi 2-qismiga (qasddan yengil tan jarohati yetkazish) asosan ma’muriy bayonnoma rasmiylashtirilib, chora ko‘rish uchun to‘plangan hujjatlar Koson tuman sudiga yuborilgan. Mirjahon Eshmurodovning qilmishini ko‘rib chiqqan sud unga eng kam ish haqqining uch baravari (900 ming so‘m)miqdorida jarima belgilagan.
Koson tuman xalq ta’limi bo‘limi axborotiga ko‘ra, Mirjahon Eshmurodovga ichki mehnat tartib-qoidalarini buzganligi, mansab yo‘riqnomasida belgilangan xizmat vazifalarini bajarishga mas’uliyatsizlik bilan qarab, xato va kamchiliklarga yo‘l qo‘yganligi uchun tuman xalq ta’limi bo‘limi mudirining buyrug‘iga ko‘ra hayfsan intizomiy jazo chorasi berilgan. Maktab ma’muriyati tomonidan Mirjahon Eshmurodovga, uning faoliyati qayta o‘rganib chiqilishi, agarda ish faoliyatida ushbu holatlar takrorlanganda navbatdagi intizomiy chora ko‘rilishini va mehnat shartnomasini bekor qilishgacha bo‘lgan qat’iy ogohlantirish berilgan.
Izoh (0)