“Pulga muhtoj bo‘lib turgandim”: Toshkentda uyida fohishaxona tashkil qilgan 64 yoshli erkak qamaldi (video)

Toshkent shahrida xonadonida fohishaxona tashkil qilgan 64 yoshli erkakka 3 yil 2 oy muddatga ozodlikni cheklash jazosi tayinlandi. Bu haqda Toshkent shahri sudlari axborot xizmati xabar berdi.

Ma’lum qilinishicha, erkakdan tanishi bir ayol bilan bormoqchi ekanini aytib, joy so‘ragan. Erkak esa o‘sha paytda pulga muhtoj bo‘lib turgani uchun 100 ming so‘m evaziga uyida sharoit yaratib bergan.

Shuningdek, sudlanuvchining xonadoni xolislar ishtirokida ko‘zdan kechirilgan paytda giyohvandlik moddasi borligi ham aniqlangan.

Bu uyda taqiqlangan narsalar bormi, deb so‘rashdi. Giyohvand moddasi bor, oyog‘im kasal, og‘riqqa chidolmaganimda ozgina ishlatib turaman, dedim. Keyin pianinoning orqasidan olib berdim. Bunday narsalar boshqa qaytarilmaydi, — deydi erkak.

Jinoyat ishlari bo‘yicha Mirzo Ulug‘bek tumani sudi tomonidan o‘tkazilgan sayyor sud majlisida Jinoyat kodeksining 131-moddasi (qo‘shmachilik qilish yoki fohishaxona saqlash) 2-qismi, 276-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qismi “b” bandi bilan ayblangan erkakka 3 yil 2 oy ozodlikni cheklash jazosi tayinlandi.