Sayyoramizning eng boy odami Ilon Mask AQSH Kongressi uchun oraliq saylovlarda respublikachilarga ovoz berishga chaqirdi. Maskning fikricha, hukumatning ijro va qonun chiqaruvchi tarmoqlarida turli siyosiy kuchlarning bo‘lishi har ikki partiya faoliyatining “yomon tus olishini” cheklaydi. Milliarder o‘zi ham “mustaqil” saylovchi ekanini ta’kidladi, ammo amalda u deyarli har doim demokratlarga ovoz berib kelgan.
“Hokimiyatlarning bo‘linishi har ikki partiya faoliyatining yomon tus olishini cheklaydi, shuning uchun prezident demokrat bo‘lganini hisobga olib, respublikachilar Kongressiga ovoz berishni tavsiya qilaman”, — deb yozdi Mask Twitter’da.
Milliarderning ta’kidlashicha, respublikachilar va demokratlar “narigi tomon” uchun ovoz bermaydi, masalani “mustaqil saylovchilar” hal qiladi.
Avvalroq AQSH prezidenti Jo Bayden Ilon Mask tomonidan Twitter’ning sotib olinishiga fikr bildirar ekan, ijtimoiy tarmoqni “yolg‘on tarqatuvchi” vosita deb atagandi. Kompaniyadagi xodimlarning ishdan bo‘shatilishiga munosabatida u “Amerikada endi muharrirlar yo‘q”ligini aytdi.
Kongressga saylovlar 8-noyabr kuni bo‘lib o‘tadi. Amerikaliklar Kongress Vakillar palatasi va Senatining uchdan bir qismini qayta saylaydi. Hozirda ikkala palata ham demokratlar tomonidan nazorat qilinadi.
Izoh (0)