Rus estradasida o‘z o‘rnini topgan “Laskoviy may” guruhining asoschisi, bastakor Sergey Kuznetsov Rossiyaning Orenburg viloyatida 59 yoshida vafot etdi. Bu haqda 7-noyabr kuni “Orenburg” davlat teleradiokompaniyasi xabar berdi.
Bastakor 5-noyabr kuni Orenburg viloyatida 2022-yilning 23-iyun kuni vafot etgan “Laskoviy may” guruhining xonandasi Yuriy Shatunov xotirasiga bag‘ishlangan konsert dasturini o‘tkazgan. Hozirda Sergey Kuznetsovning o‘limi sabablari ma’lum qilinmagan.
Ma’lumot uchun, rus bastakori 1964-yilning 6-noyabr sanasida Rossiyaning Orenburg viloyatida tug‘ilgan. U “Oq atirgullar”, “Oydin kecha”, “Pushti tun” qo‘shiqlari muallifi, shuningdek, 1986-yilda tashkil topgan “Laskoviy may”, “Chernila dlya pyatogo klassa” kabi guruhlarning asoschisi bo‘lgan.
“Laskoviy may” — 80-yillar oxiri 90-yillarda xit bo‘lgan taronalarni ijro etgan rus estradasining dunyoga mashhur guruhi. Guruh xonandalari tomonidan kuylangan “Oq atirgullar”, “Yoz”, “Tun bo‘lsin”, “Oydin kecha”, “Eriyotgan qor” kabi qo‘shiqlar nafaqat Rossiyada, balki boshqa mamlakatlarda ham hozirga qadar sevib tinglanadi.
Mavzuga doir:
Izoh (0)