Turkiyada nufuzli “Qo‘rqut ota” kinofestivali yakuniga yetdi. O‘zbek kino ijodkorlari tomonidan suratga olingan filmlar birdaniga ikki asosiy nominatsiya bo‘yicha g‘olib deb topildi.
Jumladan, rejissor Dilmurod Masaidovning “Ayol qismati” kartinasi “Eng yaxshi badiiy film” nominatsiyasda, rejissor Furqat Usmonovning “Inson” filmi esa “Eng yaxshi hujjatli film” nominatsiyasida gran-pri sohibi bo‘ldi.
Bundan tashqari, o‘zbek aktrisasi Yulduz Rajabova “turkiy xalqlar birdamligi va hamdo‘stligiga qo‘shgan hissasi uchun” “Turksoy” xalqaro mukofotiga loyiq deb deb topildi.
Aktrisa Ra’no Shodiyeva turkiy xalqlar kinematografiyasi sohasidagi xizmatlari uchun taqdirlandi. U davolanishda bo‘lgani bois mukofotni Rayhon Ulasenova qabul qilib oldi.
Kinofestival doirasida VGIK (Butunrossiya kinematografiya instituti) talabalari Akmal Obidjonov va Saida’loxon Ma’sudxonovga Turkiya madaniyat va turizm vaziri Mexmet Nuri Ersoy tomonidan “Eng kreativ qisqa metrajli film” uchun esdalik nishoni taqdim etildi.
O‘zbekistonlik kino ustalarini shunday nufuzli mukofotlar bilan chin dildan qutlayman!” – deya ta’kidladi Turkiya turizm va madaniyat vaziri Mehmed Ersoy.
“Nufuzli kinofestivalda qo‘lga kiritilgan ikki gran-pri, shubhasiz, muhtaram prezidentimiz tomonidan milliy kino rivojiga qaratilayotgan ulkan e’tibor natijasidir. 57 film orasida ikkita nominatsiya bo‘yicha g‘oliblikka erishish oddiy ish emas. Chunki 17 ta davlatdan raqobatchilar bo‘lgan festivalda aynan Yangi O‘zbekistonda shakllangan kino ijodkorlar – Furqat Usmonov va Dilmurod Masaidov muvaffaqiyat qozondi”, – ta’kidladi Firdavs Abduxoliqov.
Eslatib o‘tamiz, joriy yilning 1–5-noyabr kunlari Bursa shahrida turkiy tilli davlatlar “Qo‘rqut ota” kinofestivali ikkinchi bora o‘tkazildi. Festivalda Dilmurod Masaidovning “Ayol qismati”, Akrom Shohnazarovning “101 reys”, Ibrohim Rasulovning “Sevgi bahori” filmlari va Furqat Usmonovning “Inson” hujjatli filmi namoyish etildi.
Izoh (0)