Namanganda gaz ta’minoti bo‘yicha holatni muntazam kuzatib borish imkonini beradigan vaziyatlar markazi faoliyat olib bormoqda. Bu haqda “Daryo” muxbiri Azizbek Abduvaliyev xabar bermoqda.
Ushbu markaz viloyatdagi barcha gaz taqsimlash shaxobchalari orqali yetkazib berilayotgan tabiiy gaz oqimini onlayn kuzatib borish, zamonaviy hisoblagichlar bilan jihozlangan aholi xonadonlari va ulgurji iste’molchilar foydalanayotgan tabiiy gaz hajmlari hamda ular tomonidan amalga oshirilgan to‘lovlarni abonentlar kesimida nazorat qilish imkoniyatini yaratadi.
“Markaz yordamida viloyatga kirib kelayotgan tabiiy gaz, uning bosimi va sarfini kuzatib borish mumkin. Oldinlari kunlik ma’lumotni har 6 soatda olar edik. Hozir har soniyada tablodagi ma’lumotlar yangilanib turadi. Aqlli hisoblagichlar o‘rnatilgan aholi xonadonlari ham inson omili aralashmagan, robot tomonidan boshqariladigan dasturga o‘tkazilgan. Ushbu dastur qarzdorlik vujudga kelsa avval ogohlantiradi, to‘lov amalga oshirilmasa, tarmoqdan uzib qo‘yadi. Qolaversa, tizimdagi barcha avtomobillar GPS tizimiga o‘tkazilgan bo‘lib, ularning harakatlanishini markaz orqali to‘liq kuzatib boramiz”, — deydi “Hududgaz Namangan” gaz ta’minoti filiali bo‘lim boshlig‘i Yorqin Muborakov.
Shuningdek, viloyatdagi 432 mingdan ortiq iste’molchilarga yetkazib berilayotgan suyultirilgan gaz ta’minoti tizimi ham to‘liq avtomatlashtirilgan va doimiy onlayn nazorat o‘rnatilgan.
Namangandagi gaz ta’minoti filiali tomonida qabul qilinayotgan tabiiy gaz hajmlarining yo‘qotish holatlarini qisqartirish maqsadida viloyatdagi 14 ta shahar va tuman 51 ta yirik hududga ajratilib, ularning kirish qismiga zamonaviy elektron gaz hisoblash priborlari o‘rnatildi va avtomatlashtirilgan tizimga ulandi.
Viloyat hokimi Shavkat Abdurazzaqov mazkur vaziyatlar markazida bo‘lib, tabiiy va suyultirilgan gaz ta’minoti tizimini raqamlashtirish bo‘yicha amalga oshirilgan ishlar bilan tanishdi.
Mavzuga doir: Namangandagi issiqxonalarga tabiiy gaz uzluksiz yetkazib berilayotgani ma’lum qilindi
Izoh (0)