Toshkentda chorak baho qo‘ymasligini aytgan o‘qituvchi kaltaklandi

Toshkentning Mirobod tumanidagi 213-maktabning informatika fani o‘qituvchisi kaltaklandi. Bu haqda tuman hokimligi matbuot xizmati xabar berdi.

Ma’lum qilinishicha, holat 3-noyabr kuni taxminan soat 9:15 larda (tanaffus vaqtida) maktab binosida sodir bo‘lgan. O‘qituvchi S.A. 1-chorakda informatika fanini yaxshi o‘zlashtirmagani sababli 9-sinf o‘quvchisi bo‘lgan M.T.ga chorak baho qo‘ymasligini aytganidan so‘ng, o‘qituvchi va o‘quvchi o‘rtasida kelishmovchilik kelib chiqqan.

O‘quvchi bu haqda akasi T.M.ga aytgan. Shu maktabni 2021-yil tamomlagan T.M. (2004-yilda tug‘ilgan) vaziyatga oydinlik kiritish uchun o‘rtog‘i B.G‘. bilan maktabga kelib, o‘qituvchiga tan jarohati yetkazib, voqea joyidan qochib ketgan.

Ushbu holatdan xabardor bo‘lgan maktab rahbari S.I. o‘sha zahotiyoq IIO FMBga xabar bergan. Ayni paytda holat bo‘yicha surishtiruv ishlari olib borilmoqda.

Mavzuga doir: Namanganda o‘quvchi o‘qituvchini kaltakladi (video)