“Hisobotlarning hammasi go‘zal. Lekin har yili muammo yuz bersa, avariya holati bo‘lganday yugurib yurishadi”. Bobur Rasulyev gaz, elektr va yo‘l muammolari haqida gapirdi

“Daryo” Toshkent shahri hokimligi qoshidagi Jamoatchilik kengashi bilan birgalikda “Mahalla. Muammo. Mulohaza” loyihasini taqdim etib kelmoqda. Loyihaning 5-soni mavzusi “Toshkent ko‘chalari” bo‘lib, dastur mehmoni sifatida deputat, bloger Bobur Rasulyev taklif etildi.

Loyiha mehmoni har yili kuzatiladigan tabiat hodisalariga kutilmagan holat sifatida qaralishi, gaz, elektr va boshqa ta’minotlarda uzilish kuzatilaverishi, mutasaddilar esa o‘z ishiga yetarli darajada mas’uliyat bilan yondashmasligi haqida gapirdi.

Yomg‘ir yog‘ishini misol qilib olaylik. Nima, yog‘ingarchilik bo‘lishini oldindan bilib bo‘lmaydimi? Keyingi yil qish kelmaydi, yomg‘ir yog‘maydi, degan prognozlar bo‘lmaydi-ku!

Drenaj tizimlari bor, bir necha yil avval shularni amalga oshirish maqsadida hokimiyat tomonidan mablag‘lar ajratilgan, maqsadlar qo‘yilgan. Lekin har yili davom etadigan muammolar bor: qish kelganda gaz pasayib ketadi, elektr o‘cha boshlaydi. Bunga nahotki tayyorgarlik ko‘rib, mablag‘lar maqsadli sarflanishiga mas’uliyat sezishmaydimi? Hisobotlarning hammasi go‘zal. Lekin har yili muammo yuzaga kelganda avariya holati bo‘lganday yugurib yurishadi.

Agar o‘z tashkiloti buni hal qilolmasa, boshqa tashkilotga murojaat qilishi kerak. Lekin negadir bunday qilishmaydi, andisha deyishadimi, quda-andachilik hurmatimi yoki. Nima sababdan davlat yaratayotgan tizimdan unumli foydalanmaydi?

Bu yerda, o‘ylaymanki, mutasaddi tashkilotlarning mas’uliyati yetarli darajada emas. Ko‘p omillarni sanash mumkin, men 3-4 ta sabab ko‘raman bunda.

Birinchisi — mutaxassislarning bilimi yetishmasligi. Hozirgi texnologik imkoniyatlardan xabardor emas ular.

Ikkinchisi — mas’uliyatdan qochish. Rahbarim nima deydi, deb o‘ylaydi. Rahbar bilan maslahatlashish kerak. Mas’uliyatni boshqalarga yuklab qo‘yish kuzatiladi.

Yana bir narsani aytmaslikning iloji yo‘q: korrupsiya holatlari ham mavjud. Hozirgi kunda demokratiya timsoli bo‘lgan Ochiq budjet, masalan. Bir viloyatda yo‘lni ta’mirlash uchun yutib olingan. Ammo u yer borib tekshirilganda 1 santimetr qalinlikda asfalt yotqizilgan. Vaholanki, har bir narsaning tartib-tamoyi bor. Biz yo‘lshunos emasmiz, lekin bunday bajarish mumkin emasligini tushunamiz. Ayrim mutasaddilar sabab pullar havoga uchib ketyapti, — deydi Bobur Rasulyev.