Korzinka.uz supermarketlar tarmog‘i asoschisi Zafar Hoshimov Samarqandda o‘tkazilgan iqtisodiy forum haqida o‘z fikrlarini bildirdi.
Kechagina Samarqand shahrida o‘z ishini yakunlagan II O‘zbekiston Iqtisodiy forumi haqida qatnashchi sifatida shuni aniq va dadil ayta olamanki, forum juda samarali o‘tdi, — deb yozadi tadbirkor.
Unga ko‘ra, bu kabi forumlarning samarasi — mamlakat, mintaqa hamda umumjahon darajada sodir bo‘layotgan jarayonlar, ularning iqtisodiyotga ta’siri, ularni qanday talqin etish, shu orqali ularga nisbatan qanday ta’sir o‘tkazish, chora-tadbirlar ko‘rish haqida g‘oya va fikrlar almashinishdan iboratdir.
Mahsuli esa — bahs-munozaralar, muhokamalar va muzokaralar orqali kelajak istiqbollarni, dolzarb prioritetlarni, maslak-maqsadlarni va amaliy chora-tadbirlarni aniqlab olish, anglash va fikr-g‘oyalarni uyg‘unlashtirib olishdan iboratdir.
Xuddi ana shu prizma orqali qaraganda, bu o‘tgan forum juda muvaffaqiyatli bo‘ldi, deb hisoblayman, — deydi Zafar Hoshimov.
Forumda deyarli barcha xalqaro moliya tashkilotlari, yirik investitsion korporatsiyalar, infratuzilmalarni rivojlantirish korxonalari, xalqaro bank va moliya muassasalari, logistika, xalqaro iqtisodiy OAVlar, tadqiqot va akademiya vakillari, hamda xorijiy va mahalliy korxonalar vakillari qatnashdi.
Tadbirkorga ko‘ra, bu qatnashchilar o‘z darajasida tashkilot va korxonalarida qabul qilinayotgan qarorlarga bevosita ta’sir qilishga qodir, vakolatli qatnashchilardir. Demak, bu forumning xulosa va natijalari iqtisodiy, ijtimoiy hayotimizga davomiy ta’siri bo‘lishi shubhasiz.
Shaxsan menga, tadbirkor sifatida, ushbu forum juda ahamiyatli va foydali bo‘ldi. Unda men “birinchi qo‘llardan” olgan hozirgi vaziyatga xalqaro tashkilotlar va turli hukumatlar mutasaddilardan tortib chet el investorlari bilan forum tadbirlari hamda birga bir suhbatlarda olgan axborot va g‘oyalar, korxonamizning hozirgi va istiqbolli strategiyasini ifodalashda juda katta dalda bo‘ladi, — deb yozadi u.
Korzinka.uz supermarketlar tarmog‘i asoschisi o‘z xulosalaridan ba’zilarini sanab o‘tdi:
- Inflyatsiya kelajak bir necha yil mobaynida nafaqat mamlakatimiz, balki umumjahon darajasida eng dolzarb muammo va tahlika bo‘ladi;
- Pandemiyadan so‘ng hali jahon iqtisodiyoti o‘zini tiklab olmagan davrda Rossiyaning Ukraina bilan boshlagan urushi, nafaqat bu mamlakatlar, balki butun dunyo iqtisodiyotiga o‘ta salbiy ta’sir ko‘rsatmoqda;
- Bu sharoitda iqtisodiyotimiz o‘sish ko‘rsatkichlarini yuqori darajada ushlab turish yanada murakkab vazifaga aylanmoqda va uni yechish uchun mamlakatimizda oxirgi besh-olti yil olib borilayotgan islohotlarni yanada jadallashtirish lozim;
- Mamlakatimiz o‘sish suratlarini ushlab turish uchun chuqurroq tizimli o‘zgarishlar boshlash: xususiylashtirishni jadallashtirish, davlat iqtisodiyotni boshqarishidan iloji boricha tezroq chetlanishi, inflyatsiyaga javoban davlat xarajatlarini keskin qisqartirish, xalqaro savdoni erkinlashtirish — JSTga kirishni tezlashtirish masalalari turadi;
- Yuqori inflyatsiya sharoitida chet eldan olinadigan kreditlar narxi keskin o‘sayotgani sababli, mamlakatimiz ichida bank islohotlarini jadallashtirish, va shu asnoda o‘sishni ichki moliyaviy resurslar, ya’ni mamlakatimiz korxonalari hamda aholi mablag‘larini rivojlanishimizni moliyalashga jalb qilish, hamda iqtisodiyotimizga chet eldan to‘g‘ridan to‘g‘ri investitsiyalarni jalb qilish masalasi turadi;
- Logistika va transport taqchilligi hamda an’anaviy iqtisodiy hamkorlarimizda ro‘yobga kelayotgan qiyinchiliklarni hisobga olgan xolda eksport va import bozorlarimizni diversifikatsiya qilish hamda yangi transport koridorlar va logistik yechimlar izlash dolzarb muammo;
- Iqtisodiy o‘sishni barqarorlik tamoyillari asosida amalga oshirish ya’ni atrof muhit va ekologiya, huquqiy kafolatlar, ijtimoiy masalalar, jumladan, gender tenglik, yoshlar siyosati, inklyuzivlik, iqtisodiyotimizda korporativ boshqaruv andozalarini tatbiq etish va rivojlantirish orqali rejalarimizni amalga oshirish.
Unga ko‘ra, shu qadamlar orqali, forum o‘z shiorida e’lon qilgan inson qadri va inson manfaatiga xizmat qiluvchi islohotlar rejasiga yanada chuqurroq uyg‘unlik kiritishga muvaffaq bo‘ldi.
Zafar Hoshimovning yozishicha, yaxshi xabarlar ham talaygina:
Forumning nafaqat ommaviy tadbirlarida, balki shaxsiy yakkama yakka suhbat va uchrashuvlarda ko‘pgina chet ellik salobatli investorlar va amaldorlar mamlakatda bo‘layotgan jadal o‘zgarishlar, ilg‘or jarayonlar haqida ijobiy fikrda bo‘ldi.
Garchi, ularning nazarida, bir qarashda, islohotlar surati bir oz sekinlashganday tuyulsa-da, iqtisodiyotda jadal to‘g‘ri qadamlar qo‘yish davom etsa, hozirgi tahlikali sharoitda mamlakat oldida noyob imkoniyatlar paydo bo‘layotganini ko‘p ta’kidladi.
Ularning aytishicha, O‘zbekiston to‘g‘ri yo‘l tanlagan va xuddi shuning uchun, hatto pandemiya sharoitida ham iqtisodini rivojlantira oldi.
Mintaqadagi qator qiyinchiliklar paydo bo‘layotgan bu sharoitda ham biz yana bir bor g‘olib bo‘lib chiqishimizga imkoniyatlar katta, — deb yozadi tadbirkor.
Muhimi, shu onda O‘zbekistonga dunyo iqtisodiy va moliyaviy doiralarining nazari tushgan, jadal rivojlanish bo‘sag‘asida turgan, notinch mintaqada barqaror rivojlanib, dadil qadam bosayotgan va dunyo moliyaviy va iqtisodiy doiralari uchun alohida jozibaga ega makon bo‘lib shakllanyapti.
Bu imkoniyatni qo‘ldan berishga haqqimiz yo‘q, deb o‘ylayman, — deb yakunlaydi Zafar Hoshimov.
Izoh (0)