Toshkent shahrida 1—4-sinflar uchun yaratilgan zamonaviy yangi o‘quv komplekslarini sinovdan o‘tkazishga tanlangan maktab o‘qituvchilari uchun besh kunlik malaka oshirish kurslari o‘tkazilmoqda. Mazkur o‘quv komplekslari XXI asr ko‘nikmalarini rivojlantirishga qaratilgan zamonaviy o‘qitish usullaridan foydalangan holda yaratilgan.
O‘quv-uslubiy komplekslar o‘qish, matematik savodxonlik, kompyuter ko‘nikmalarini rivojlantirishga yordam beradigan vazifalardan iborat va zamonaviy dunyoda insonga zarur bo‘lgan boshqa ko‘plab kompetensiyalarni o‘z ichiga oladi.
O‘quv mashg‘ulotlarida viloyatlardagi 14 ta maktabdan, jumladan, Qoraqalpog‘iston Respublikasidan jami 179 nafar o‘qituvchi ishtirok etmoqda. Mashg‘ulotlar yettita guruhda olib boriladi: oltita guruhda o‘zbek tilida, bitta guruhda esa rus tilida.
Har bir mashg‘ulot 1—2-sinf va 3—4-sinflarda turli fanlarni o‘qitish tamoyillari va o‘ziga xos xususiyatlarini o‘zlashtirishga bag‘ishlangan. Kurs davomida o‘qituvchilar “Matematika”, “Texnologiya”, “Informatika va axborot texnologiyalari”, “Tabiatshunoslik”, “Tasviriy san’at”, “Ona tili va o‘qish savodxonligi”, “Matematika”, “Texnologiya”, “Informatika va axborot texnologiyalari”, “Tarbiya” va yangi “Moliyaviy savodxonlik” kabi fanlarni o‘qitish, shuningdek husnixat bilan ishlash va Alifbeni o‘rgatish metodikasini puxta egallashi kerak bo‘ladi. Bundan tashqari, ular o‘quv jarayonida elektron ta’lim resurslaridan foydalanishni ham o‘rganadi.
Materialni samarali mustahkamlash uchun ish har bir ishtirokchi bilan alohida, juft holda va mini-guruhlarda amalga oshiriladi. Vaqtning katta qismi loyiha ishlariga bag‘ishlangan bo‘lib, uning davomida o‘qituvchilar guruhlarda darsning ma’lum bir mavzusi bo‘yicha loyihalar ishlab chiqadi va ularni taqdim etadi.
Ushbu kurslar o‘qituvchilarga o‘quvchilarda quyidagi 4 K malakalarni shakllantirishni o‘rgatishga qaratilgan:
- hamkorlik — jamoada ishlash qobiliyati;
- kommunikatsiya — muloqot qilish qobiliyati;
- ijodiy fikrlash — ixtiro qilish, maqsadga erishish uchun qiziqarli yondashuvlarni topish qobiliyati;
- tanqidiy fikrlash — o‘z fikrini mustaqil ifoda etish qobiliyati.
Treningni tamomlagan barcha o‘qituvchilar tegishli sertifikatlarga ega bo‘ladi.
Mazkur treningda Respublika ta’lim markazi va “Avloniy” malaka oshirish markazi mutaxassislari kuzatuvchi sifatida qatnashadi.
Izoh (0)