“Deputatlik sha’niga dog‘ tushirdi”. Maktab o‘quvchisini kaltaklagan qamashilik so‘kong‘ich deputat deputatlar safidan chiqarildi

Qashqadaryo viloyatining Qamashi tumanida maktab o‘quvchisini o‘lasi qilib kaltaklagan va jurnalistni haqorat qilgan deputat deputatlar safidan chiqarildi. Bu haqda O‘zLiDePning rasmiy kanalida ma’lum qilindi.

Ma’lum qilinishicha, kecha, 5-noyabr kuni Qamashi tumanida Tadbirkorlar va ishbilarmonlar harakati — O‘zbekiston Liberal-demokratik partiyasi tuman Kengashi hamda Xalq deputatlari tuman kengashiga O‘zLiDePdan saylangan deputatlarning qo‘shma majlisi bo‘lib o‘tgan.

Qo‘shma yig‘ilishda partiya a’zosi, xalq deputatlari tuman kengashi deputati Nurtoyev Panji Norboyevichning partiya a’zosi, qolaversa, tuman kengashi deputati nomiga dog‘ tushiruvchi nojo‘ya xatti-harakatlari atroflicha muhokama qilindi. Yig‘ilish ishtirokchilari P.Nurtoyevni ko‘p yillardan beri tumanda fermerlik harakati rivojiga hissa qo‘yib kelayotgan shaxs, “Mirzadala Norboy” fermer xo‘jaligi rahbari sifatida tumanda yaxshi bilishlarini ta’kidlab o‘tishdi.

Mazkur yo‘nalishdagi faolligini inobatga olgan holda, partiya tuman kengashi o‘z vaqtida uning nomzodini dastlab partiya a’zoligiga, keyinchalik xalq deputatlari tuman kengashi deputatligiga ilgari surganligi aytib o‘tildi. Lekin, bularning barchasi shu kunlarda u tomonidan sodir etilgan salbiy holatlarni oqlamasligi ko‘rsatib o‘tildi. Huquqiy davlatda hech kimga har qanday holatda ham jismoniy kuch ishlatish, o‘zboshimchalik bilan, qonunni qo‘pol tarzda buzib, jazo qo‘llash vakolati berilmaganligi ta’kidlandi, — deyiladi O‘zLiDeP axborot xizmati ma’lumotida.

Ta’kidlanishicha, deputatlar Panji Nurtoyevning maktab o‘quvchisini ayovsiz kaltaklanganini hech narsa bilan oqlab bo‘lmasligini aytib o‘tgan.

Qolaversa, mazkur voqeaga aniqlik kiritish maqsadida unga murojaat qilgan jurnalistning savollariga bergan bema’ni javoblari, xususan, ishlatilgan haqoratli so‘zlari nafaqat uning o‘zi, oilasiga, balki u a’zo bo‘lgan partiyaning obro‘siga, deputatlik sha’niga jiddiy dog‘ tushirdi. Yig‘ilish qatnashchilari Nurtoyevning qonunga zid ushbu qilmishlarini hech qanday vaj bilan asoslashning imkoni yo‘qligi, yo‘l qo‘yilgan mazkur xatti-harakati bilan u partiya Ustavi talablarini qo‘pol ravishda buzganligi, oqibatda bundan keyin uning partiya safida qolishi aslo mumkin emasligiga urg‘u berishdi, — deyiladi mas’ullar izohida.

Qo‘shimcha qilinishicha, O‘zLiDeP Qamashi tuman Kengashi o‘z vakolatlaridan kelib chiqib, deputatning amaldagi qonunlarga zid harakatlari bilan partiya sha’niga dog‘ tushirgani uchun O‘zLiDeP Ustavining 3.4. bandiga asosan uni partiya safidan chiqarish masalasini ovozga qo‘ygan. Taklif majlis ishtirokchilari tomonidan qabul qilingan.

Shuningdek, partiya tuman Kengashi hamda deputatlik korpusi ishtirokida bo‘lib o‘tgan majlisda Panji Nurtoyevning bu qilmishlari deputatlik odobining umume’tirof etilgan normalarini qo‘pol ravishda buzuvchi va deputatlik maqomiga dog‘ tushiruvchi holat sifatida baholanib, O‘zbekiston Respublikasining “Xalq deputatlari mahalliy kengashi deputatini, O‘zbekiston Respublikasi Oliy Majlisining Qonunchilik palatasi deputatini va Senati a’zosini chaqirib olish to‘g‘risida”gi Qonunining 2-moddasi bilan siyosiy partiyalarga berilgan vakolatga asoslangan holda uni deputatlikdan chaqirib olish borasida Xalq deputatlik Qamashi tuman kengashiga tavsiyanoma kiritish masalasi ham ovozga qo‘yildi va ishtirokchilar tomonidan ma’qullandi, — deyiladi partiya markaziy Kengashi axborotida.

Majlisda qabul qilingan qarorlarni partiya Ustavi va tegishli qonunchilikda belgilangan talablar asosida tasdiqlash uchun O‘zLiDeP viloyat Kengashiga kiritish borasida kelishib olingan. Panji Nurtoyev tomonidan yo‘l qo‘yilgan bu kabi noqonuniy harakatlar kelgusida ro‘y bermasligi uchun mazkur holatlarni partiya va deputatlik yig‘ilishlarida keng muhokama qilish tavsiya etilgan.