Ижтимоий тармоқларда Сирдарё вилояти Янгиер шаҳрида ички ишлар ходимлари фуқарога тан жароҳати етказгани ҳақида хабар тарқалди. Бош прокуратура ҳолат юзасидан ўрганиш ишлари олиб борилди.
Қайд этилишича, 25 сентябрь куни ҳуқуқни муҳофаза қилувчи орган ходимлари томонидан тезкор тадбир ўтказилган. Унда У.Т. (1992 йилда туғилган; муқаддам Жиноят кодексининг 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан судланган) Янгиер шаҳридаги хонадонларнинг бирида яшовчи, муқаддам судланган Й.И. (1980 йилда туғилган)дан таркибида кучли таъсир қилувчи модда бўлган дори воситаларини сотиб олган вақтида ушланган.
Тадбир давомида у қўлида бўлган дори воситаларини ерга ташлаб юбориб, фаол қаршилик кўрсатган ва қочиб кетишга ҳаракат қилган. Бироқ у ҳуқуқни муҳофаза қилувчи органлари ходимлари томонидан ушлаб қолинган.
Мазкур ҳолат юзасидан 27 сентябрь куни Янгиер шаҳар ИИБ томонидан Жиноят кодексининг 276-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзламай қонунга хилоф равишда тайёрлаш, эгаллаш, сақлаш ва бошқа ҳаракатлар) 2-қисми «а» банди билан жиноят иши қўзғатилган.
Ҳозирда дастлабки тергов ҳаракатлари олиб борилмоқда.
28 сентябрь куни У.Т.нинг акаси ички ишлар ходимлари укасига нисбатан куч ишлатганини билдириб, прокуратурага мурожаат қилган.
Ҳозирда Янгиер шаҳар прокуратураси томонидан қўшимча терговга қадар текшириш ҳаракатлари олиб борилмоқда.
Изоҳ (0)